香港人自2019年6月開始對抗政府強權，多次上街為自由民主訴求抗爭，政府就只以軍政獨裁手段回應，期間大批市民被濫捕、被濫傷，民間為支援呢一班香港人，設立咗多個自發嘅基金，不過極度依賴公眾捐款――有見及此，香港本地一啲小商戶都以義賣方式協助呢一啲基金籌募經費繼續運作。
其中位於小西灣邨小西灣廣場2樓嘅「叮叮老香港辦館」，佢哋一向以香港電車作特色，服務生活喺附近一帶嘅居民。店主Eric接受本台訪問時都表達咗街坊小店經營困難嘅無奈，更加直言「生意只係靠一般街坊支持，連貨源鬥唔贏連鎖店」。
不過即使經營艱苦亦都搵唔到乜嘢錢，Eric認為「自己作為一個香港人，都應該要為近月社會抗爭做一啲嘢」。
熱愛電車嘅Eric決定2019年11月3號喺佢嘅辦館，以每架80蚊嘅價錢義賣「叮囑香港」電車模型，扣除一般成本同埋必要開支之後，餘數將會全額捐贈畀「星火同盟 抗爭支援」基金――不過由於電車模型上面嘅標語係全部依賴人手裱貼，所以暫定只賣300架。
原本Eric只係喺辦館Facebook專頁上面登出呢一個消息，但義賣消息一呼百應，11月3號中午12點鐘開舖之前，已經有一批熱心人士喺辦館門外排隊，等候購買呢一款義賣嘅「叮囑香港」電車模型――本台記者仲見到有海外人士專誠趕嚟購買。
有唔少人購買到呢一款義賣嘅電車模型之後，都立即喺辦館門前影相打卡，期望喺網絡上可以召集更多人支持香港嘅抗爭行動。
其中一名日本人接受本台記者訪問時表示，今次佢哋未必能夠企喺香港人最前線直接參與抗爭，但對於義賣呢種活動，佢哋認為有能力就必須予以支持，「何況義賣嘅係最代表到香港嘅電車」。
Eric指出，今次佢嘅義賣行動會確保公開、透明，會公佈所有收支報表，捐出金額亦都會提供相關收據證明。
本台記者喺Eric嘅辦館入面見到，唔單止提供連儂牆貼有支持香港人抗爭嘅標語，更放映一啲「大台」無播出、有關警察濫暴嘅片段，依家仲開宗明義搞義賣支援抗爭，問到喺領展商場入面咁做會唔會擔心「出事」，Eric簡單直接咁答「我又唔係做犯法嘢！」，據佢講至今領展人員未有阻撓，亦好彩街坊好支持咁做。
辦館早前亦曾參與「全民三罷」行動，喺近來「罷買vs懲罰」嘅行動之中，Eric嘅辦館亦獲得「香港人米豬蓮指南」嘅「勁買」標籤，表揚佢對於今次香港嘅抗爭行動作出支援。
Eric直言，作為一個香港人，都應該運用著自身嘅能力，「即使只係一間小店店主，都希望以有限資源喺範圍內出一分力」。
香港人，加油！香港人，反抗！
Be the first to comment