【法國巴士】巴黎往倫敦巴士 公路翻側29人傷

當地時間11月3號近中午，一班巴黎往倫敦嘅FlixBus歐洲跨境巴士，沿法國A1快速公路行駛，去到法國北部索姆河地區阿布蘭庫爾普雷蘇瓦爾附近，駛離公路時發生意外。

當地應急部門接報後立即出動救援，期間公路封閉咗大約一個鐘頭。巴士當時載有32名乘客，其中5人重傷，連同另外24名輕傷者被送到當區多間醫院治理。

根據現場相片，可以睇到巴士翻側後多塊玻璃破碎，巴士部份車身變形，救援人員經巴士頂緊急出口視察。

法國《Courrier Picard》報導指Flixbus會個別安排巴士接載乘客返回巴黎。英國《鏡報》表示Flixbus正同當局緊密聯繫，務求釐清車禍起因，並確保全力支援受影響乘客。

由於有10名乘客係英國籍，英國外交及聯邦事務部發聲明指已經聯絡法國當局，並會為求助嘅英國人做部門可以做得到嘅嘢。