10月27號，九龍梳士巴利花園有公眾活動，近月 賤 戰意高昂嘅军政府卫队（曾稱為「香港警察」）將西九龍地區實施「半戒嚴狀態」，其中西九龍主要幹道彌敦道更多次被卫队堵塞，引致西九龍地區唔少公共巴士路線大亂。
由於係星期日，彌敦道沿路都係想享受週日假期嘅市民、外傭、遊客，卫队嘅車輛堵塞彌敦道引致大批公共巴士無法去到各巴士站接載候車乘客，令大家想搭巴士走都唔得。
另一方面，因為道路無法通行，唔少公共巴士塞喺馬路，一眾巴士車長都無奈呆等，唔少巴士車長畀巴士乘客落車後都只能夠落地「吹風」。至於有幸未塞到入車龍入面嘅公共巴士，巴士車長就各自諗辦法避開受阻路段，繼續維持服務。
卫队堵路令公共巴士行唔到，但其實唔少途人都唔知「事態嚴重」，繼續喺彌敦道沿路各個巴士站等巴士。由於長時間都無公共巴士可以「埋站」，各個巴士站都累積咗唔少等搭公共巴士嘅乘客。
雖然呢班巴士乘客久久未見有公共巴士到站，但一直都係和平、理性、非暴力咁默默「等了又等」。
不過，綜合各方前線職員同乘客嘅經歷，善於「始暴製亂」嘅卫队，見到彌敦道各巴士站嘅等巴士人龍，竟然多次針對巴士乘客開咪大嗌「你哋呢班暴徒」，甚至揚言「放催淚煙」、「使用武力拘捕」。
對於卫队呢種「濫權」言論，唔少巴士乘客都極憤恨，部份仲即時「回敬」指「搭巴士都話要拉，咁即係逼人『反枱』啫！」
至於公共巴士業各前線職員就同心協力，儘力喺混亂中維持服務。例如原本去尖沙咀嘅公共巴士，一度以彌敦道窩打老道交界做臨時總站，盡量接載需要搭公共巴士嘅乘客。
而喺彌敦道一片混亂嘅路面狀況下，一眾公共巴士前線職員喺唔少年輕人協助指揮交通嘅情況下，都不負乘客所望，順利咁儘力履行職責。
行文至此一刻，突發組嘅前線記者不斷回報返嚟，指卫队不斷喺彌敦道兩邊堵路、肆意拘捕佢哋睇唔順眼嘅市民、由地鐵站入面向彌敦道附近街頭胡亂發射催淚彈、以暴力對待嘗試正常採訪嘅前線新聞工作者…好明顯香港已經成為一個戰場――不過係一個軍政獨裁嘅政權向平民百姓宣戰。
2 Trackbacks / Pingbacks