話說喺2019年10月16號，英格蘭嘅巴拉福特有一名巴士乘客， 喺朝早搭緊當地620號巴士返學嘅時候，發覺有一隻狗神情落寞咁孤單坐喺巴士上面嘅關愛座。
當佢見到呢個情景，佢就即刻拎起智能電話、影咗一張相、發放到社交媒體上面――呢一隻孤獨咁搭巴士嘅狗，神情令人心生憐憫――相片好快就被網民喺社交媒體上面不斷轉載，原相喺社交媒體上嘅連結，到執筆之時已經被轉發超過3600次。
呢一位巴士乘客喺接受英格蘭當地傳媒訪問時表示， 其實佢上巴士嗰一刻，就已經發現到呢隻狗坐咗喺關愛座。佢搭巴士嘅過程之中，仲留意到「呢隻狗神情恍惚，不過除咗偶然會低聲哀鳴，整體上呢隻狗態度良好，非常之平靜，亦無滋擾巴士上嘅其他乘客。」
呢位乘客指出，呢隻狗「除咗身上嘅一套吊帶之外，就無配帶頸圈，更加係無人陪住佢搭巴士。」
呢一程巴士入面，呢隻狗「偶然會索下身邊嘅空氣試圖分辨氣味，就好似搵緊人咁樣」。
當巴士去到一個油站附近「埋站」嘅時候，呢隻狗一度想衝落巴士，但由於嗰個地方位處一條繁忙大街， 一眾巴士乘客都非常擔心呢隻狗會畀車撞到，所以都慌忙阻止呢隻狗落巴士。
最後呢隻狗去到巴拉福特嘅一個巴士轉車站，由車站職員轉交當地動物庇護所暫時照顧。
根據動物庇護所嘅社交媒體帳戶所講，喺佢哋接收呢隻狗嘅時候，發現呢隻狗除咗眼部有少許問題之外，整體健康良好。
至於講返網民廣傳嘅嗰一張相，呢隻狗個樣咁楚楚可憐真係激發到公眾同情，令到好多人關注可唔可以收留呢一隻狗。
根據動物庇護所喺社交媒體嘅講法，佢哋喺呢張相被擺上社交媒體之後，好快就收到海量查詢，不過佢哋需要按照當地法例將呢隻狗先保留最少七日，等佢真正嘅主人嚟到認領。
而動物庇護所亦都明言，希望網民唔好一窩蜂咁因為睇到一張喺巴士上影到嘅相，就完全集中喺呢隻狗上面，咁樣只會令到佢哋耗費太多時間喺一隻動物上面――如果網民係有心去協助流浪動物嘅話，其實喺動物庇護所入面有唔少同樣需要有人收留嘅流浪動物，希望網民可以將愛心散發，幫助埋其他動物，「幫輕」佢哋嘅工作。
相比起今次英格蘭人面對呢一隻搭巴士嘅狗嗰種平和同關顧，同類型事件發生喺香港，往往唔少人就只會驚呼狂叫、嚇到跳起咁款，然後或者只會集體去責難巴士車長「做乜畀動物上巴士」。
大家唔好笑… (=_=)”
唔知大家仲記唔記得2018年10月9號，有一隻貓走咗上九巴ATENU574（TM523）@905上面，結果一班巴士乘客嘅反應係「爭住衝落巴士」，加上警察要拎埋盾牌去處理，令外人以為佢哋喺巴士遇到小怪獸！
常言道：「一個社會嘅文明進步程度同佢哋善待動物嘅態度成正比」。香港人對於自己社區嘅動物，唔少都各走極端，一係盲目放任，一係盲目恐懼…香港社會文明係咪真正好似香港人自己以為咁進步呢？
尤其係當香港執法人員面對一隻貓都需要拎住盾牌去處理，究竟對住人嗰陣，佢哋會以為需要用到乜嘢武力水平呢？諗起都令人心寒。
2 Trackbacks / Pingbacks