司機不適致小巴撞壆復剷交通燈 消防救護車無暇遂派聖約翰送醫

2022年2月27號傍晚近6點，1架服務九龍專綫小巴12B號路線、行走大角咀港灣豪庭←→港鐵旺角東站嘅16座豐田Coaster（車輛登記：PF5973），由旺角東站公共運輸交匯處轉落聯運街期間，司機報稱不適，小巴繼而擦到左邊路壆，然後撞上路中間嘅交通燈。

車禍後小巴車頭有明顯損毀，現場金屬圍欄扭曲變形，交通燈柱亦被撞倒。幸好車禍後未有堵塞上落旺角東站公共運輸交匯處嘅兩條行車線，九巴嘅44、58X、59X、67X、93K號巴士路線可以維持正常服務。

現場消息指車禍中只有小巴司機唔舒服，但新型冠狀病毒（武漢肺炎）肆虐香港，消防處嘅緊急救護車早已不敷應用，今次車禍需要轉交香港聖約翰救護機構，由佢哋位處公主道近亞皆老街嘅聖約翰救傷隊九龍救護站調派救護車，到場治理小巴司機並送院。