話說近來人氣高企嘅年輕藝人姜濤適逢2021年4月30號就係22歲生日，有支持者早前就委託香港電車公司，出咗一啲電車站廣告同埋電車全車身嘅廣告。
隨著披上姜濤全車身廣告嘅 #5 電車喺2021年4月23號正式「出街」，大家都會估到去到姜濤生日正日4月30號，一眾支持者一定會「有所行動」。
無錯！就正正喺2021年4月30號姜濤22歲生日正日嘅夜晚，佢嘅一眾支持者一早雲集喺 #5 電車，喺呢趟常規班次唱起歌聯歡慶祝姜濤22歲生日。而當 #5 電車去到銅鑼灣總站嘅時候，姜濤嘅呢一班支持者仲紛紛落車集體打卡大合照。
究竟一班人聚集喺常規班次公共交通車輛上面搞活動算唔算可以豁免「限聚令」？ 或者喺呢個每日都令人不安嘅亂世之下，不如放鬆少少一晚啦！
短暫喧鬧過後， #5 電車喺午夜之前就已經返返去屈地街電車廠嗰邊，過程中繼續做返普通電車嘅服務。
香港人輕鬆吓一晚啦！反正只要乖乖地保持地方清潔，又無造成噪音滋擾，何以不能為呢？
2 Trackbacks / Pingbacks