九巴「巨龍」放會展 化身玩具推銷員

因為新型冠狀病毒（武漢肺炎）持續肆虐，香港多項大型活動被逼改期，直到近來疫情趨緩之際，香港本地消費展覽先至陸續恢復舉行。

其中原定喺2020年12月舉行嘅第18屆「香港冬季購物節」亦推遲到2021年4月2~6號舉行，搞到變咗做「香港春季購物節」。

其中香港本地玩具商東方玩具有限公司旗下牌子微影為推廣佢哋其中一啲展會限定現貨巴士玩具、精品，特別安排咗保育緊嘅九巴丹尼士巨龍12米3門版本古董巴士（車隊編號：3N24，車輛登記：DC1148）到展會坐陣。

根據資料，「3N24」早喺1984年6月投入服務，去到1998年轉做訓練巴士，直至2013年初，期間有唔少新入職九巴嘅巴車長所揸嘅第1架12米巴士就係呢一款。

2013年正值九巴首次獲得專營巴士權利80周年，當年九巴為慶祝值得紀念嘅周年，特別將旗下訓練學校入面呢一架「3N24」巴士修復返去服役時個款，並安排喺2013年4月嘅傑出車長選舉中向公眾展出。

雖然話九巴當年大規模咁更換咗車身上好多塊鋁板，務求可以長期保留，而九巴亦唔係用傳統手掃油漆方式翻新塗裝，而係經油房噴上塗裝油漆，但喺展會所見，可能近年外觀上嘅保養未夠好，巴士望落已經相對唔再光鮮。

講到巴士車廂入面，乘客座椅係有按照原來服役時期嘅安排重新安裝，雖然話已經唔係「原裝櫈」，但九巴修復時盡量搵返相近物資，睇落都算同原裝相差唔遠。

至於上落上下層嘅樓梯，由梯級以至扶手，經過修復之後，同樣都係類似返服役嗰時個款。

因為喺今次展會期間，相關公司表示巴士上層唔會開放，所以巴士上層車廂嘅照片就不便公開，希望終有一日公眾可以有機會親身去體驗回味當年搭巴士嘅感受。