【臺灣巴士】肺炎疫情大打擊 雙層觀光陷困境

新型冠狀病毒（武漢肺炎）疫情持續，臺灣政府為保障公眾安全，果斷頒佈入境限制令，以儘量減少由境外引入病例。當然，臺灣旅遊業界難免大受打擊，臺北市雙層觀光巴士頓成「重災戶」，2020年2月載客率創咗開檔3年以嚟新低，目前平均每班巴士只係載到3個客，甚至有試過一日之內起碼5、6班巴士係「載空氣」。

對此，臺北市雙層觀光巴士執行長徐浩源直言，雙層觀光巴士係臺灣觀光業門面，唔能夠畀佢停業，業者無錢賺唔緊要，但至少唔好蝕，呼籲政府可以用補助、開放跨區營業、旅行業包車租用等伸出援手，唔係嘅話唔排除要停駛。

臺北市雙層觀光巴士自從2017年1月開始運作，到今日一直都虧蝕，艱辛捱過咗3年之後，經營狀況開始有起色，2019年平均每月載客量約10000幾人，業界原本認為2020年目標係每月至少11000人，平均每日載客350~400人左右。

不過徐浩源表示，受到新型冠狀病毒（武漢肺炎）疫情影響，業績一路插水，2020年2月更加創出通車以嚟最慘紀錄，近一個月以來平均每日載客唔到100人，甚至出現多班巴士都係「0人」。

徐浩源話，臺北市雙層觀光巴士客源多數係國外遊客，過去臺灣每日入境遊客約65000人，如今只剩19000人，國外遊客人數急跌8成，造成依家雙層觀光巴士嘅慘況。

徐浩源表示，當初臺北市政府想成立雙層觀光巴士，推廣臺北市觀光，但成立至今，市政府除咗當時補貼買巴士之外，就無再提供過任何補貼，感覺觀光巴士連公車業界都不如，明明係代表國家推廣國際觀光，但當初叫業界投資、撐政府，如今有難，政府就置諸不理，令業界好傷心。

徐浩源表示，目前臺北市雙層觀光巴士紅、藍線每天大約25班，全部都係蝕本經營，如今疫情打擊客量，有可能會減班，若情況再無改善，甚至唔排除直接停駛。

徐浩源希望臺北市政府可以提供補助，就算只係補助臺灣民眾免費搭都好，起碼咁都有助於刺激臺北市觀光消費；另外亦希望可以開放跨區營運，或者畀旅行社可以租車導覽等，尤其依家係櫻花季，以及3月桐花季，都係值得推廣嘅觀光盛事。

徐浩源話，只要係短期接駁、路況良好，雙層觀光巴士都可以行駛，但政府應該要諗辦法幫幫忙，唔好令到代表國門觀光嘅雙層觀光巴士走上停業之路。