是咁的…之前講過喺英格蘭有巴士乘客發現一隻狗獨自搭巴士，結果當地唔少人善心爆棚咁爭著想收養…
而喺另一處地方――美國華盛頓州西雅圖，當地巴士乘客都發現一隻狗獨自搭巴士，不過就係另一種故事…
「大家好呀~我個名叫「日食」（Eclipse）…我係拉布拉多同英國獒犬混血兒，好高興同各位地星人見面！」
「日食」近來喺當地社交媒體圈子入面做咗「名狗」，原因係佢每日都會去屋企附近嘅巴士站，自己搭巴士去市中心嘅狗公園搵自己啲「真．狗友」聚吓…聚完就又自己搭巴士返屋企開飯。
咪以為「日食」會搭「霸王巴士」喎~佢識得用掛喺頸圈嘅智能卡拍卡畀巴士錢㗎！
成件事個起源就咁嘅…原本「日食」係由一位叫積夫嘅狗主（狗奴？）帶去狗公園，點知有一日積夫同「日食」等巴士時忍唔住要食返支煙（吸煙危害健康！），巴士到站嗰陣積夫未食完支煙，作為負責任嘅公民，積夫當然唔會叼著支煙上巴士啦――不過掛著去搵朋友嘅「日食」有理無理就自己上咗巴士！
然後…巴士車長閂門出站囉！
當然係因為巴士車長認得「日食」呢位長期乘客，所以先至畀「日食」自己搭巴士，仲知道要喺邊個站畀「日食」落巴士添！
試過幾次之後，積夫發覺畀「日食」自己搭巴士去狗公園、再自己搭巴士返歸係行得通，積夫索性出張智能卡畀「日食」，等「日食」自己搭巴士去會友。
「吓？香港啲地星人話汪星人、喵星人搭巴士好恐怖？西雅圖呢邊啲地星人唔係咁睇囉！」
嗰條巴士路線嘅車長同乘客，每逢見到「日食」嚟搭巴士都好開心，個個都面露笑容咁歡迎佢――起碼「日食」識得拍卡畀巴士錢、識得一個乘客只佔用一個座位、識得啲腳唔可以「飛象過河」、識得唔可以大聲 傾電話 講嘢…不過好似啲腳趾撳唔到落車鐘 (=_=)”
對於「日食」咁樣自己搭巴士出入，有人曾經向西雅圖警方徵詢過意見，西雅圖警方表示只要巴士車長覺得「日食」成個搭巴士流程係無問題，西雅圖警方自然亦會准許「日食」自己搭巴士出入。
好多人對畀仔女自己搭公共巴士都驚呢樣嗰樣，「日食」就用行動話畀大家聽：「你大我呀？！」
常言道：「一個社會嘅文明進步程度同佢哋善待動物嘅態度成正比」。香港人對於自己社區嘅動物，唔少都各走極端，一係盲目放任，一係盲目恐懼…香港社會文明係咪真正好似香港人自己以為咁進步呢？
Be the first to comment