【臺灣】雙北「922無車日」 市區巴士全免費

臺北市政府為咗響應 9 月 22 號嘅「國際無車日」，2026年頭一次同新北市攜手合作，搞咗個「922無車日雙北公車免費搭」大型活動。

呢次活動以「一天少開車、一次新體驗、一個新習慣」做主題，呼籲公眾喺無車日當日畀私家車休息一日，轉搭公共交通工具、行路或者踩單車，透過唔同嘅交通選擇，體驗一下更輕鬆、更綠色嘅低碳城市生活。

呢個全免費搭車嘅活動喺2026年9月22號正式登場，當日雙北市區總共有 719 條路線、高達 5 842 架巴士參與，當局預計服務超過 200 萬人次。

公眾喺當日乘搭除咗觀光巴士紅線同藍線之外嘅雙北市區公車嗰陣，全部唔洗拍卡、唔洗入錢，直接上車就搭得！所有參與活動嘅巴士車身都會貼上免費搭乘標示，方便公眾認清楚。

臺北市交通局指出，「無車日」唔單止淨係叫大家「唔好揸車一日」，更希望透過免費搭車嘅誘因，鼓勵平日習慣揸車嘅公眾親身體驗一下，其實搭巴士一樣好方便。

呢日唔單止市政府員工會一齊響應，全臺北市高中以下嘅學生亦會實行「低碳通學」；同時，內湖科技園區同各大企業都會用綠色運輸嚟支持「無車日」。

除此之外，雖然呢日係返工日，但臺北市政府交通局同埋觀傳局特別策劃咗 10 條「一日公車小旅行」路線，串連咗臺北市各區嘅文化觀光景點，邀請公眾趁住呢日搭免費巴士去體驗，等大家以後去玩嗰陣，都可以多個搭巴士遊臺北嘅選擇。

臺北市交通局亦提醒大家，呢日搭巴士見到免費搭乘標示，直接上車就得，千祈唔好戇居居走去拍卡或者投幣；等車嗰陣記得排隊、先落後上，上到車要坐穩扶好，企喺度嘅話就要揸實扶手，落車前記得早啲撳鐘同埋小心隨身財物。公眾亦可以善用「雙北AI公車站長」嚟plan行程，落車之後再行路或者踩 YouBike，用多元嘅綠色交通工具完成成個旅程。

臺北市交通局強調，臺北市嘅公共運輸網絡非常完善，巴士唔單止係返工返學嘅代步工具，仲可以係另一種深度探索城市嘅方法，希望試吓「咪再揸車、轉搭公車」，畀自己架車抖一日，重新認識同埋感受臺北有幾靚，由呢次全新嘅交通體驗開始，慢慢將綠色運輸變成日常生活嘅新習慣！

據臺北市交通局透露，觀察咗當日朝早繁忙時間公眾搭車狀況之後，發現巴士乘客人數比上星期同時段增長咗 10%，反映公眾反應非常之咁熱烈。巴士營運方面，截至朝早 10 點為止，各巴士公司已經配合加開班次，發車班次比平時增加大約 15 ~ 20%，整體運作相當順暢。市政府初步統計大約有 2 000 名員工以綠色運輸方式返工、全市高中、初中、小學學生全面響應「低碳通學」、內湖科技園區有超過 15 000 名企業員工響應，除咗搭免費巴士之外，仲有人選擇共乘或者踩單車通勤。