【英國】倫敦交通局話會加起 53 個巴士車長洗手間

話說，早喺2021年，香港有人就話海盈邨加個巴士車長休息室都要搞到平地風波，事件擾攘咗3個月先至解決。不過呢啲欠缺設施嘅爭議就唔係淨係得香港有嘅…

根據英國廣播公司2026年9月21號嘅報道，倫敦交通局日前表示，未來3年將會撥款喺倫敦各區加起 53 個全新嘅巴士車長洗手間，確保「每一條路線嘅巴士車長都有合適嘅如廁設施」。

倫敦交通局指出，依家倫敦有6條巴士路線嘅總站係完全無洗手間設施，另外仲有10條路線雖然總站有廁所，但喺成條線嘅營運時間內未必次次入到去用。

倫敦市長簡世德（Sadiq Khan）表示，當局正「全速推進」安裝呢啲「不可或缺設施」嘅工程。

英國工會地區幹事梅莊（John Murphy）就話，呢個計劃對改善車長福利嚟講係重要一步，但仲有好多嘢要做。佢話：「所有倫敦巴士車長都應該有權喺一年 365 日、全日 24 小時都用到合理嘅廁所設施。工會會繼續爭取，直至呢個目標達成實行為止。」

倫敦交通局表示，倫敦接近 700 條巴士路線入面，大部分喺其中一個或者兩個總站都設有洗手間，依家正同各方相關人士合作，為嗰6條仲未有廁所嘅路線物色地點。

倫敦交通局街道與網絡營運總監（Director of Streets & Network Operations）艾卡爾（Carl Eddleston）話，巴士車長「絕對有權期望」擁有基本嘅洗手間設施。佢補充：「我哋會繼續同營辦商、車長同埋工會緊密合作，確保每個員工喺巴士網絡度都可以返工返得安全又舒服。」

其實巴士車長都係有生命嘅，生理需要無可避免，提供適切嘅設施都係確保公共巴士服務繼續安全可靠。