九巴 x HKDI 舊零件變遮變櫈變枱燈

舊巴士零件拆下之後，通常都會丟掉報廢。但運用設計概念，就隨時變出有用嘅物品，既符合環保概念，又成為商機。九巴與香港知專設計學院(HKDI)再度合辦「Next Stop: Better Living」退役巴士零件產品設計比賽，吸引逾20名來自HKDI 多個學系嘅學生參加比賽，各參賽作品都具特色及實用價值。

參加者透過座椅皮革、扶手及落車鐘等各類退役巴士零件作為設計素材，創作出一系列時尚家具、擺設。唔少作品可謂別具心思，其中修讀珠寶設計及科技學系嘅的何文巧及葉浚熙，利用扶手環、落車鐘按鈕等材料，設計成雨遮，獲得比賽銀獎之外，九巴更已委託基督教家庭服務中心翠林工場生產100把，供九巴前線職員使用。

另一個可謂較矚目嘅得獎作品，為採用扶手樋、落車鐘、暖風機扇葉「重組」而成嘅枱燈。四名參賽嘅學生為修讀傢俱及時尚產品設計嘅鍾珀賢、林穎妍、黃愷林及袁凱欣，佢哋連同另一作品 ─ 圓櫈，更奪得金獎。

主辦單位期望，比賽能透過交通界、教育界與社福界三方合作，令退役巴士零件可以繼續在社區發揮用途，並讓學生發揮設計知識和專業技能，庇護工場學員有機會施展匠心手藝，實現「三贏」。九巴顧客體驗部主管吳家敏形容，是次比賽讓社會見證結合環保、創意及社區關愛的成果，共同推動可持續發展。