【中東】伊朗無差別報復中東鄰國 Big Bus Tours宣佈暫停中東服務

阿拉伯聯合酋長國（阿聯酋）嘅杜拜（Dubai）多年嚟都係伊朗嘅洗白天堂，協助伊朗繞過國際制裁——杜拜將西方貨物先喺傑貝阿里港（Port of Jebel Ali）卸落地，換張新提單，再用小帆船運入伊朗；杜拜亦安排經紀做「白手套」，令伊朗可以唔用跨境電匯嘅情況下將伊朗里亞爾（Iranian Rial）兌匯成國際貨幣（尤其係美元）而唔留任何痕跡。

但係伊朗針對美國、以色列嘅轟炸而向周邊阿聯酋、沙特阿拉伯、阿曼等多個阿拉伯國家發起無差別報復，自2026年2月28號朝早，多年嚟協助伊朗嘅阿聯酋首當其衝，杜拜、阿布扎比（Abu Dhabi）面臨嚟自伊朗嘅幾百次飛彈以及無人機襲擊。雖然大多數襲擊都被攔截，但伊朗嘅襲擊仍然喺阿聯酋造成傷亡，引起阿聯酋居民恐慌，而伊朗嘅飛彈更一度擊中停泊國際郵輪嘅海域，威脅到阿聯酋作為中東金融、物流、旅遊嘅樞紐。

鑑於近期中東衝突升級，尤其伊朗嘅無差別報復，跨國開篷觀光巴士集團Big Bus Tours喺2026年2月28號決定立即暫停營運阿聯酋嘅杜拜、阿布扎比，以及阿曼嘅馬斯喀特（Muscat）所有Big Bus Tours以及Tour Dubai。

剛啱喺2026年1月12號上任嘅Big Bus Tours行政總裁保羅 史東咸（Paul Stoneham）表示，作出呢個決定係出於對Big Bus團隊以及乘客安全「絕對考慮」——考慮到局勢不斷變化以及當地政府發布嘅指導意見，佢哋認為呢個係「正確而且負責任」嘅做法。

保羅同時講到儘管局勢急轉直下，但佢好高興可以確認當地所有員工都安全，Big Bus Tours嘅巴士廠以及巴士車隊都安然無恙，而公司會持續透過官方渠道以及實地資訊密切關注中東事態發展。

保羅話意識到局勢影響咗Big Bus Tours營運，公司會持續每日評估情況，到安全而且適宜嗰陣就會恢復服務。

保羅亦衷心感謝Big Bus Tours全球嘅員工喺艱難時期展現出專業精神、堅韌不拔、鼎力支援。

最後保羅表明：

照顧好我哋嘅團隊同埋客戶係我哋一如既往嘅首要任務。