【新加坡】新一輪「巴士連接增強計劃」將新增7條巴士路線

新加坡陸路交通管理局嚟緊幾個月會推出7條全新巴士路線，以及延長2條現有路線，其他巴士服務亦將被進一步改善。

新加坡交通部代部長蕭振祥喺2026年2月9號親自落到去淡濱尼北巴士轉換站宣布新加坡陸路交通管理局新一輪「巴士連接增強計劃」（Bus Connectivity Enhancement Programme，BCEP）。

新加坡陸路交通管理局指出，自從2024年7月推出「巴士連接增強計劃」以嚟，當局已經搞咗27條全新或者延長巴士路線，並且改善咗62條現有巴士路線嘅服務。當局咁樣做可以改善交通銜接，尤其係離地鐵站較遠嘅新住宅區，以及喺高客流量嘅地鐵綫，為乘客提供沿綫替代公共交通服務。

相關措施包括新增往返市區嘅快捷巴士服務，以及採用更快、通往地鐵站嘅有限停站巴士服務——目前每日大約有244 000名乘客受惠。

新加坡當局表示，嚟緊幾個月會再推出7條全新巴士路線，並且延長2條現有路線，同時進一步改善其他巴士服務。

呢啲改善措施係根據檢討過巴士網絡覆蓋範圍以及乘客量之後，再同基層組織顧問以及社區領袖協商先至制定。

新加坡交通部政務部長馬炎慶亦宣布喺登加增設2條新嘅巴士路線。

由2026年3月8號開始，登加（Tengah）會有831號全新巴士路線。同時97號以及97e號巴士路線亦由原本嘅裕廊東延長到登加，為居民提供更多直達巴士路線選擇。

181號巴士路線嚟緊亦會由裕廊西延長到登加。

此外，接住落嚟嘅幾個月仲會推出5條繁忙時間運作嘅巴士路線。其中457、458、459號巴士路線會分別為後港、盛港、榜鵝居民提供直達環線（Circle Line）以及大成（Tai Seng）就業中心嘅交通選項。

另外，460號巴士路線會連接淡濱尼大道（Tampines Boulevard）以及淡濱尼地鐵站，461號巴士就為義順東居民提供更快直達卡迪地鐵站（Khatib MRT）嘅巴士服務。

684號直達市區巴士服務（City Direct Service）亦將會推出，連接紅磚站（Brickland）以及武吉巴督西與中央商業區。

新加坡當局表示，到接近落實日期嗰陣，會再公布更多詳情。

新加坡交通部代部長蕭振祥指出，儘管當局希望增加更多巴士服務，但仍然要面對巴士車長人手不足嘅挑戰——尤其係聘用新加坡本地巴士車長更見困難。

蕭振祥表示當局一直積極招聘新加坡本地巴士車長，但即使付出好大努力，成效仍然有限。往往每招聘到1名新加坡本地巴士車長嘅同時，就會有2人因為轉行或者退休而流失。結果新加坡本地巴士車長嘅年齡中位數已經達到56歲——而年齡中位數近年仲快速上升緊。

蕭振祥話會研究新加坡本地巴士車長嘅起薪，希望能夠吸引更多人入行。如果能夠成功招聘到更多司機，將會令當局擁有更多選擇，亦能夠更快擴展新加坡巴士網絡。