【日本】「遊客太多」、「塞爆巴士」？京都市巴士改變超過半世紀嘅搭車模式

（京都市交通局公布嘅資料以及示意圖放咗喺報道後段）

京都市交通局喺2026年1月29號宣布會改變旗下「京都市營巴士」（京都市営バス）固定統一票價巴士路線（「均一系統」）嘅搭車模式，由「後上前落」轉做「前上後落」，有望緩解近年遊客增多引致塞爆巴士嘅問題，但需要大規模改造市內巴士站。

搭車方式全面變化 目標：2028年度結束時完成

2026年1月29號，京都市交通局宣布會喺旗下「京都市營巴士」固定統一票價巴士路線（「均一系統」）引入新嘅「前上後落」搭車模式。準備工作定喺2026年度開始，整個實施計劃預計3年內、2028年底完成。

新嘅「前上後落」搭車模式會喺「京都市營巴士」84條「均一系統」路線中嘅60條路線上實施。雖然京都市交通局自2024年6月已經喺2條旅遊快線（観光特急）巴士線路上實施「前上後落」搭車模式，但呢次擴展去到另外60條「均一系統」路線，可以話係一大飛躍。

超過半個世紀以嚟，京都市嘅公共巴士都係採用「後上前落」搭車模式——「中門上車，前門落車，落車畀錢」——乘客由巴士嘅中門上車，並且喺到站嗰陣由前門落車同時繳付車資。

京都市交通局嘅新方案，其實即係引用返日本以外國家比較常見嘅「前上後落」搭車模式——「前門上車，上車畀錢，中門落車」——乘客由巴士嘅前門上車，並且喺上車嗰陣同時繳付車資，到站嗰陣可以直接由中門落車。

「前上後落」嘅搭車模式其實自2017年開始已經喺「京都市營巴士」少數嘅巴士路線進行試行，原本計劃1~2年內推展到「均一系統」路線，但由於新型冠狀病毒（武漢肺炎）疫情造成嘅經濟影響，2020年起斷續暫停，整個計劃亦決定要推遲。根據京都市交通局所講，2026年決定擴大實施「前上後落」係因為隨着新型冠狀病毒（武漢肺炎）疫情結束，京都市公共巴士客量大增，巴士車廂再次出現「塞爆」嘅問題。

京都市交通局解釋，「京都市營巴士」半個世紀以嚟採用嘅「後上前落」搭車模式，喺面對如今咁大量嘅巴士乘客，巴士車廂較後位置想落車嘅乘客會同啱啱上車嘅乘客喺中門位置交匯，阻礙乘客暢順咁落車，呢次京都市交通局將引入「前上後落」搭車模式視為「緩解巴士車廂乘客擠塞嘅最有效方法」。

耗資20億日元 大規模改造550個巴士站

京都市交通局表示，為旗下「京都市營巴士」嘅「均一系統」路線引入「前上後落」搭車模式，需要大規模改造巴士站同埋巴士。為咗令作為上車入口嘅巴士前門對準乘客排隊等車隊頭位置（尤其係「導盲磚」），巴士埋站位置會向後移半架巴士嘅車身長度。如果喺作為落車出口嘅中門新位置有欄桿或者花槽等障礙物阻礙乘客通行，就需要移除或者改造呢啲障礙物或者修剪植物。

改造巴士站嘅項目預計耗資大約20億日元，適用「均一系統」路線區域嘅1260個巴士站入面，預計大約有550個需要改造。此外，巴士車廂內外嘅出入口指示牌以及廣播設備等都需要作出相應改動。

改造巴士站嘅現場勘測同埋設計工作會係2026年度進行，詳細設計工作同埋巴士改造就安排咗喺2027、2028年度進行。實際嘅巴士站改造工程計劃喺2028年度進行。

京都市交通局嘅「京都市營巴士」自從1972年開始配合市內公共巴士改由1名車長負責駕駛以及收費，就沿用「後上前落」搭車模式，隨著「京都市營巴士」嘅巴士路線拓展到可變票價區（「調整系統」：票價根據路線行進而變化嘅區域），加上同其他巴士公司接軌，整個京都市嘅公共巴士系統就全面使用「後上前落」搭車模式。

但係呢種同外國公共巴士倒轉嘅搭車模式，當嚟到21世紀京都要面對海量嘅外國遊客，京都市居民習慣咗超過50年嘅「後上前落」搭車模式終於要迎嚟改變。

京都市營巴士推行「前上後落」系統（349533）

背景

• 2019年3月：逐步喺旅遊景點嘅巴士路線上實施「前上後落」搭車模式，務求令巴士車廂入面嘅乘客行得暢順啲。
  • 2019年3月：100、京都市電東山線接駁巴士
  • 2020年3月：102
  • 2021年3月：101、106、111
  • 2020年4月起：間歇暫停
  • 2021年4月起：完全暫停
• 2020年12月：受新型冠狀病毒（武漢肺炎）疫情影響，延後先前宣布推展到固定統一票價巴士路線（「均一系統」）嘅計劃。
• 新型冠狀病毒（武漢肺炎）疫情結束後，旅遊業復甦導致巴士再次出現「塞爆」問題。
• 車長人力短缺導致運力難以提升，引入「前上後落」搭車模式被認為係解決巴士「塞爆」問題嘅最有效方法。

效益

• 乘客可以更暢順咁落車
  • 落車門喺巴士中間，即使巴士車廂入面乘客較多，擠逼嘅情況下，乘客都能夠比較暢順咁落車。

• 處理收費嘅流程會無咁阻礙行車
  • 對於持有大額紙幣需要找續或者IC卡未能成功拍卡嘅乘客，「上車畀錢」嘅方式比起「落車畀錢」嘅方式無咁阻礙巴士繼續行程。

• 考慮允許攜帶隨身行李
  • 由於車長可以喺乘客上車時得知有行李以及尺寸，京都市交通局考慮喺引入「前上後落」搭車模式允許乘客攜帶較為大件嘅行李搭巴士，具體措施將會喺未來商討。

計劃

• 84條固定票價嘅「均一系統」路線中嘅60條路線實施「前上後落」搭車模式
  • 唔包括目前已經投入使用「前上後落」搭車模式嘅2條「観光特急」路線

細節

• 巴士改造
  • 巴士內外嘅出入口標誌以及廣播系統等設備需要作出改動。

• 巴士站改造
  • 由於巴士入口（前門）需要同乘客喺巴士站排隊等候嘅位置（尤其係「導盲磚」）對齊，使用「前上後落」搭車模式之後巴士埋站嘅位置將比較使用「後上前落」搭車模式嘅時候向後移動半架巴士車身長度。
  • 如果新嘅巴士出口（中門）位置有任何阻礙乘客落車嘅障礙物——例如係欄桿、花槽、石壆等——將被移除或改造。
  • 根據巴士站嘅具體情況，有部分巴士站可能需要重新安置「導盲磚」同埋站牌。

「京都市營巴士」巴士站
總數	1 642
固定統一票價區內	1 260
需要修改	約550

巴士站設置變更以及改造示意圖

下面示意圖入面，虛線底下嘅巴士代表原有「後上前落」搭車模式下巴士埋站嘅位置，用以對比虛線上面實施「前上後落」搭車模式後巴士埋站嘅位置，而紅圈標示代表如果喺投入使用「前上後落」搭車模式後巴士落車出口處需要移除任何阻礙乘客嘅障礙物，例如欄桿或者花槽等。

• 有蓋巴士站
  • 站蓋、「導盲磚」、站牌位置保持唔變

• 無蓋巴士站
  • 「導盲磚」、站牌位置可以郁

• 無蓋巴士站
  • 「導盲磚」、站牌位置無得郁

預計進度

• 2026年度
  • 巴士站改造嘅現場勘測、測量、設計
• 2027~2028年度
  • 巴士站改造詳細設計、巴士改裝
• 2028年度
  • 巴士站改造
• 2028年度結束前
  • 正式引入「前上後落」搭車模式

預計成本

• 約20億日元
• 巴士站改造嘅具體細節會喺勘測、設計階段進行仔細審查
• 整個項目總成本要喺未來先至確定