事發
當地時間2026年2月5號中午，1架愛爾蘭巴士公司（Bus Éireann）配Wright Eclipse Gemini 3系車身嘅富豪B5TL型雙層巴士（車隊編號：VWD80，車輛登記：172-D-15863）喺愛爾蘭都柏林市中心撞向行人專用區，造成1人死亡，3人受傷，傷者正喺醫院接受治療。
都柏林當局喺當地時間2026年2月5號1232時接到報案，指有1架雙層巴士沿托巴特街（Talbot Street）去到馬爾博羅街（Marlborough Street）交界嗰陣，直撞入列咗做行人專用區嘅北伯爵街（North Earl Street），有途人被撞倒。
有現場店舖職員以及顧客表示，事發時有巨響，起初以為係有欄桿倒冧或者係屋頂有嘢跌落街，當行出去見到係成架巴士剷咗入行人專用區，已經有途人埋去嘗試協助傷者。
救援
都柏林消防隊向當地傳媒表示，「接報發生咗1單涉及巴士同埋行人嘅交通意外…派出咗超過20名消防救護員以及高階急救員連同4架消防車、2架配備重型救援工具嘅緊急拯救車、1架高階急救應變車趕去現場…嚟自國家救護服務隊嘅2名區長亦率領4架救護車以及1架快速應變急救車嘅人員到場。」
救援人員喺接報後3分幾鐘到場，當時有行人被困巴士車底，消防員需要使用工具升起巴士，有傷者傷勢嚴重。由於擔心涉及大量傷者，當局一度通知民間救護車到場戒備。
呢次交通意外入面，1名80幾歲途人當場證實身亡，而1名20幾歲男途人傷勢嚴重但無生命危險，另外1名30幾歲女途人以及50幾歲女巴士司機都受傷，3人都由救護車送到醫院接受治療。
愛爾蘭警察亦到場拉起封鎖線，警員驅散喺現場「只顧拎手提電話攝錄而阻礙救援」嘅圍觀者，有警員喝斥「你哋企喺度睇唔清楚吖嘛？既然都睇唔到，咁仲唔走？」都柏林消防隊亦呼籲公眾避免去意外現場附近。
善後
當局亦已經委派1名家庭聯絡官（FLO）接觸死者家屬，處理善後工作。愛爾蘭警察認定呢次巴士衝擊行人專用區純粹係交通意外，公眾唔需要擔心係恐怖襲擊，交通意外調查人員進行勘查蒐證，務求查出呢次交通意外嘅起因。
愛爾蘭巴士公司證實，呢次意外涉及旗下1架巴士，但表示事發時嗰架巴士並未投入營運；公司會全力配合當局調查，並提供一切必要嘅額外協助。
愛爾蘭巴士公司行政總裁奧蘇里雲（Jean O’Sullivan）表示，公司對呢次悲劇事件「深感悲痛」，「我謹代表愛爾蘭巴士公司全體員工，向遇難者家屬致以最深切慰問，並向所有受影響嘅人表達我哋喺呢個艱難時刻嘅慰問。」
政界反應
愛爾蘭司法部長奧卡拉漢（Jim O’Callaghan）出席愛爾蘭議會下議院會議時表示：「好遺憾咁同大家講，意外造成1人死亡，另有3人送院。我哋向遇難者家屬以及所有喺醫院接受治療嘅傷者致以最深切慰問。我哋祝願佢哋早日康復。」
都柏林市長麥亞當（Ray McAdam）去到現場表示：「喺呢個艱難時刻，我與所有傷者以及佢哋嘅家人同在。我亦向3名傷者以及佢哋嘅家人致以慰問同埋祈禱…我認為都柏林市民都感到震驚同埋悲痛，呢次係一件令人極其痛心嘅事件。」
對於現場有圍觀者「只顧拎手提電話攝錄」，麥亞當呼籲公眾唔好分享任何現場照片或者影片：「我真心希望大家唔好咁樣做……如果有人之前影咗相，請唔好將呢啲相上傳到網絡。但願上帝保佑，呢種事可能發生喺我哋任何人身上。諗下嗰啲無辜者嘅家屬，佢哋本身可能無聽到或者睇到事發經過，但喺社交媒體上見到呢啲相被廣傳，咁樣真係令人難過。」
新芬黨領袖、代表都柏林市中心嘅民選議員麥當勞（Mary Lou McDonald）表示「得知呢單發生喺我哋市中心嘅可怕事件，感到非常震驚…我向遇難者家屬以及所有喺呢次事件中被撞或捲入嘅人，包括佢哋嘅家人、朋友同埋愛人，以及所有受事件影響嘅人致以最深切慰問，呢次無疑係1次非常可怕嘅經歷。」，佢亦對救援人員表達謝意。
都柏林中心選區社會民主黨議員甘農（Gary Gannon）表示與受害者以及佢哋嘅親人同在：「呢次係一單令人震驚嘅悲劇事件…震撼咗我們嘅社區。我祝願所有傷者早日康復…對於身處現場附近嘅居民，請避開事發區域，以便救援人員做嘢…務必遵循官方渠道以及可靠新聞來源嘅指示。」
有當地議員表示，由於事發現場屬於特定時間容許送貨車輛進入嘅行人專用區，所以喺路口並未有設立防止車輛衝擊嘅路障，佢哋認為可以討論點樣加設保護行人嘅裝置，避免將來再有機會發生類似嘅慘劇。
Be the first to comment