當地時間2019年12月19號傍晚17點左右，英格蘭東部沙福郡嘅城鎮葉士域治發生一宗巴士車禍，當地人見到個情景之後，聯想返以前，都紛紛喺網上恥笑。
事緣當時一架第一巴士集團旗下當地分公司First Eastern Counties Buses Ltd嘅富豪B7TL雙層巴士，喺揸到去葉士域治醫院，巴士車長諗住巴士上有一名孕婦，所以「為人為到底」咁將巴士儘量揸到最近醫院大門嘅位置畀呢位孕婦落巴士，結果就喺醫院範圍扭去格力．安達臣中心正門嗰陣，巴士就撞到急症室門外嘅簷篷。
雙層巴士對建築物簷篷，正常情況梗係簷篷贏㗎啦！呢架裝有Transbus ALX400型車身嘅雙層巴士，左側上層車頭位置撞到散咗…好彩當時無乘客坐喺嗰堆座位，所以無人受傷。
雙層巴士撞埋急症室門口簷篷本身都算幾戲劇性嘅事，只不過更戲劇性嘅事係：原來同一架雙層巴士喺2012年撞過同一個位置！
當地人喺Facebook上面都議論紛紛，覺得件事都幾過癮，有網民仲問「喂…係咪同一個司機呀？」，甚至乎講笑咁話「呢架巴士值得入博物館喎！」
至於當地巴士迷就比較關心，呢架雙層巴士2003年10月投入服務，到依家都16年，今次撞到咁，可能第一巴士都唔會整返好佢囉！
Be the first to comment