香港中風學會電車巡遊 宣揚「談笑用兵」及早預防中風

「世界中風組織」自從2006年開始，每年10月29號舉辦「世界中風關注日」，北京同仁堂曾經喺2022年10月29號舉辦「同仁關愛防中風」全民免費搭電車日活動，亦係香港歷嚟首個以「關注中風」為主題嘅全民免費乘電車日，希望由呢次活動呼籲市民一齊參與關注中風。

腦中風分成主要兩類：

• 缺血性中風成因多數係血管狹窄，亦有機會可能係心源性中風，例如心房顫動、心臟病等，亦有一啲係微細血管病變，例如長期血壓唔正常引致。
• 出血性中風常見原因就係長期血壓高，引致血管壁破裂，亦有病人因年紀大，腦血管病變引致血管穿咗，亦有些較為年輕嘅人可能因為腦血管畸形或者腦血管扭曲，引致爆血管。

不過中風係無話邊一種較為嚴重之分——後果一律都可以好嚴重——因此及早發現中風徵兆、及早進行治療，對減低中風後遺症非常重要。因應中風近年更有年輕化嘅趨勢，公眾應該及早關注預防中風嘅資訊，保護自己以及身邊人。

為咗提高公眾對預防中風的關注，「香港中風學會」搵咗香港本地著名插畫家麥家碧用知名漫畫角色「麥兜」以生動有趣形式介紹預防中風嘅口訣——「談笑用兵」：

• 「談笑用」係常見中風徵兆：
  • 「談」：講嘢有困難言語不清，表達唔到
  • 「笑」：面部表情唔對稱
  • 「用」：手腳用唔到、唔協調、發唔到力
• 「兵」係即時應變：如果出現以上病徵，就要「班救兵」——即時求醫，危急情況更加需要打999召喚救護車送院

「香港中風學會」為咗加強推廣公眾關注中風嘅徵兆以及盡早反應，佢哋喺2025年10月26號下晝搵嚟香港電車一齊合作，進行咗一次喺鬧市嘅電車巡遊活動。

呢次電車巡遊喺下晝14時由屈地街電車廠出發，由#128派對電車帶頭、#97全車身廣告載客電車緊隨其後，沿着電車路途徑上環、中環、金鐘、灣仔、銅鑼灣，一直去到北角，隨後兜咗落去跑馬地，再返回屈地街電車廠，喺大約17時完結。

呢次電車巡遊期間，巡遊電車上面嘅「香港中風學會」成員不斷向途經嘅市民以及其他電車上面嘅乘客推廣關心中風徵兆嘅「談笑用兵」資訊，有市民表示經過呢次宣傳之後知道咗原來一啲簡單嘅身體變化可能暗示自己有中風嘅風險，會喺平日多加留意身體狀況。

身為香港人，2025年嘅「世界中風關注日」適逢係重陽節公眾假期，當大家同屋企人度過節日嘅時候，不妨多啲關心佢哋會唔會有比較高嘅中風風險。