【日本】雀巢普瑞納新版「貓咪巴士」喺「猫の日」去到神戶亮相

日本「猫の日」係1987年由日本寵物食品協會設立，用以慶祝、紀念貓咪同人類和平共處，因為日語發音中「2」同貓叫聲（「ニャン」）接近，所以日本「猫の日」就訂喺每年2月22號。

雀巢普瑞納寵物食品公司（以下簡稱「雀巢普瑞納」）喺日本嘅行動救援貓咪領養活動——「貓咪巴士」——2018年4月啟動，截至2025年12月已經幫助超過360隻獲救貓咪搵到新嘅屋企。

運作多年之後，雀巢普瑞納決定更新車輛。

2026年2月日本「猫の日」周末，隨着將獲救貓咪（原本失去家園或者無家可歸嘅貓咪）連繫上新飼主嘅全新「貓咪巴士」已經製作完成，並且會喺神戶亮相、舉辦領養活動。

雀巢日本有限公司、雀巢普瑞納安排咗喺2026年2月21、22號假神戶丸井購物中心・三宮中心街舉辦「貓咪巴士」亮相活動，展出呢架新嘅「貓咪巴士」同埋一班獲救貓咪。

雀巢普瑞納表示，一直致力成為寵物主人喺寵物一生中最信賴、最優質嘅寵物照顧選擇，並且會連同眾多合作夥伴公司、地方組織、政府機構攜手合作，提供超越食品公司範疇嘅服務以及行動，例如解決同寵物飼養相關嘅社會問題、維護寵物同主人之間長久嘅幸福關係、透過營養均衡嘅食品協助寵物健康長壽。

更新後會保留「貓咪巴士」獨特「貓樣」外觀，加上「貓咪咖啡館」式內部裝潢，為貓咪提供安全、舒適、自由生活環境。

雀巢普瑞納表示，借鑒2024年能登半島地震後開展貓咪救援行動嘅經驗，「貓咪巴士」新車嘅車頂仲配備太陽能板提供電力支援，呢項設備喺應對突發災害嗰陣係簡單而有用嘅裝置。

透過「貓咪巴士」呢項活動，雀巢普瑞納旨在令公眾加深認識領養貓咪呢一個選擇，鼓勵盡可能多的貓咪被領養，並促進普及動物福利。

雀巢普瑞納亦希望提供「貓咪巴士」呢一個空間，畀公眾體驗貓咪與生俱來嘅可愛、為生活帶嚟嘅溫暖、人同貓咪相伴嘅快樂。

「貓咪巴士」概覽

正式名稱	「貓咪巴士・貓咪咖啡館式領養活動」
內容	為咗解決「貓咪熱潮」背後日益嚴重嘅「貓咪安樂死」社會問題，呢項活動旨在為獲救貓咪提供一個同新家庭相遇嘅場所。
主辦單位	・雀巢普瑞納寵物食品公司 ・Neco Republic, Inc.
特色	・獨特「貓咪巴士」設計、「貓樣」外觀引人注目。 ・由於係可以移動，所以可以去到唔同人流密集嘅場所舉辦活動。 ・「貓咪咖啡館」主題內裝令貓咪感到安全、舒適，並且可以自由活動。公眾都可以享受寬敞空間，同貓咪互動。 ・呢架「貓咪巴士」係全面新裝，配備人同貓咪一齊休息嘅梳化、冷暖氣系統、防止貓咪逃走嘅雙層門、貓走道、貓砂盆、洗手設施。
全新特色	・裝有亞加力透明面板嘅籠方便公眾觀賞貓咪，亦同時令到貓咪可以凸顯自己可愛之處。 ・每個籠都設有通風口，既能引入新鮮空氣，又能保持舒適溫度。 ・內建籠簡化咗內部清潔、消毒流程，顯著縮短領養活動所需要嘅準備時間，亦減少咗參與活動人士以及貓咪需要分隔相處嘅時間。 ・「貓咪巴士」車頂設太陽能板，可以喺難以搵到電力供應嘅地區轉由太陽能板提供電力，而唔需要長期運轉引擎——兼顧環保之外亦拓展「貓咪巴士」能夠服務嘅範圍，唔單止可以去公園、廣場呢啲喺城市入面嘅日常場所，更加適應到災害等特殊情況下嘅臨時部署行動。

「新車亮相及領養活動」概況

日期	2026年2月21、22號
地點	神戶丸井購物中心・三宮中心街
時間安排	・1200~1220 ・1230~1250 ・1300~1320 ・1330~1350 ・1400~1420 ・1430~1450 ・1500~1520 ・1530~1550
貓咪數量	約12隻
參與方式	領養活動參與者可以喺每日1100起去到現場領取號碼牌

呢次活動由神戶市獸醫協會協助舉辦，並由動物行為獸醫監督，嚴格按照以貓咪福利為首要考慮嘅操作手冊進行。主辦方聲稱，具體而言會事先詳細按照有關貓咪嘅個性以及當日身體狀況，並以此安排適當休息、互動。同時，主辦方亦會全程喺附近對出現任何異常情況立即反應。主辦方表示會根據以往領養活動經驗以及現場監督動物行為獸醫嘅建議，不斷改進應對措施。

【文明指標】巴士座上孤身狗 幸得善長覓收留

【日本巴士？】大正時代「古董巴」 或列日本「文化財」