【澳洲】女子襲擊巴士司機及乘客後逃走 即日被警方搵到拘捕

澳洲1名29歲女子喺2026年2月11號涉嫌襲擊1名巴士司機，並且拎滅火筒向巴士司機以及其他乘客噴射，被警方拘捕後喺2026年2月12號出庭受審。

當地時間2026年2月11號1040時左右，1名女子喺澳洲首都領地（Australian Capital Territory）坎培拉（Canberra）市郊林納漢姆區（Lyneham，華文名稱按澳洲旅遊局翻譯）嘅一架巴士上同其他乘客發生爭執。

巴士司機同嗰名女子交涉過幾句之後，嗰名女子走向駕駛室並且試圖搶奪巴士車匙，隨後嗰名女子涉嫌襲擊巴士司機，仲打爛咗巴士司機太陽眼鏡。

之後嗰名女子涉嫌拎起滅火器，向巴士司機以及其他乘客噴射滅火劑，然後徒步離開現場。

澳洲聯邦警察接報後到場調查，並且喺2026年2月11號即日嘅1420時左右，去到林納漢姆區內搵到嗰名涉案女子，隨即拘捕扣留嗰名涉案女子。

嗰名涉案女子被安排喺2026年2月12號去到澳洲首都領地裁判法院出庭，佢被控以毀壞財產、擾亂公共秩序、普通攻擊3項罪名。