【巴西】全球首批電動雙掛接巴士投入服務

巴西戈亞尼亞（Goiânia，編按：電影《焚城》嘅劇本就係參考呢個城市喺1987年發生嘅嚴重放射性污染事故）已經接收全球首批電動雙掛接巴士，呢批巴士由富豪巴士提供，並且投入常規客運服務。

呢次投入服務嘅包括21架大容量電動掛接巴士以及1個全新充電中心，旨在支援戈亞尼亞市快速巴士系統（BRT）。

呢21架新電動掛接巴士包括16架單掛接（雙節）、5架雙掛接（三節），都係用富豪巴士嘅BZRT電動底盤，呢批底盤喺富豪巴士位於巴西古里提巴（Curitiba）嘅廠房製造，車身就用巴西馬可孛羅（Marcopolo）生產嘅Attivi型，已經喺戈亞尼亞大都會公共交通網路（RMTC）快速巴士系統嘅「東-西綫」投入服務。

除咗有新嘅電動掛接巴士，當地市政府連同計劃合作夥伴喺2026年1月30號一齊去到當地METROBUS S.A.嘅巴士廠為充電中心掲幕。呢個充電中心配備咗23個額定功率為240千瓦嘅充電樁，可以同時為多達46架巴士充電，能夠支援高運量線路的嘅定期充電以及日常車輛輪換。

富豪巴士呢一款電動雙掛接巴士長 28 米，最多可以容納 250 名乘客；而電動單掛接巴士長 21 米，最多可以容納 180 名乘客。兩款電動掛接巴士都採用2架額定功率為 200 千瓦嘅電動摩打，總輸出 400 千瓦；其中電動雙掛接巴士配備嘅8個電池組容量最高可達 720 千瓦時。

為咗令到重量分配得更平均令車輛更穩定，電動摩打安裝喺地板下方中央位置，電池組亦喺地板底下，從而乘客艙有連續平坦嘅地板，無需設置凸起部分。此外，呢批電動掛接巴士配備駕駛輔助及安全系統，包括視野輔助系統鏡頭、盲點監控感測器、交通標誌識別系統。

富豪巴士拉丁美洲區副總裁安德烈馬克斯（Andre Marques）表示：「呢次標誌着高運量城市交通嘅一個變革性時刻。推出全球首批投入服務嘅電動雙掛接巴士車隊，充分展現咗強而有力嘅合作夥伴關係以及對可持續發展交通嘅共同承諾之下所能夠取得嘅成就。戈亞尼亞嘅公共交通解決方案領域擁有悠久嘅開拓歷史，我哋好榮幸能夠連同合作夥伴共同延續呢項傳統。由2005年首批雙掛接巴士到如今嘅全電動掛接巴士車隊，我哋嘅合作始終致力喺突破現代公共運輸嘅界限。」

呢次推動電動掛接巴士嘅計劃由多個機構合作開發，包括HP Mobilidade、GreenMob Capital、Suécia Veículos、富豪金融服務、富豪巴士，整個計劃入面嘅融資、車輛供應、充電基礎設施以及車隊營運都由合作夥伴共同負責，呢批電動掛接巴士旨在減少當地道路交通排放並且現代化車隊基礎設施。