「觀光城巴」新增「海岸之旅」正式登場！

之前提過，城巴旗下「觀光城巴」全新路線「海岸之旅」H3、H4號路線原本打算喺2025年3月17號配合特首日前宣佈嘅「盛匯超級三月」活動投入服務。然而，去到2025年3月17號嗰日，殺出嚟嘅反而係連繫市民、旅客前往香港、九龍各個藝文地標嘅H1S號路線，仲講到話會喺2025年3月29號搞個「免費試搭日」云云。

時間去到2025年3月28號，正當2025年3月都去到尾聲，城巴終於公布「海岸之旅」H3、H4號路線會喺2025年3月31號正式啟航，為香港「盛匯超級三月」奉上壓軸巨獻，亦標誌「觀光城巴」正式拓展網絡去到港島南區以及西區。

「觀光城巴」嘅「海岸之旅」H3、H4號路線覆蓋多個港島沿岸景點，包括堅彌地城新海旁、赤柱、淺水灣海灘，以及南區熱門景點香港仔、海洋公園。為帶領香港市民以及訪港旅客去到香港各大景點留低難忘回憶，貢獻香港旅遊業以及經濟發展，「海岸之旅」新路線啟航後，「觀光城巴」就會營運合共6條觀光路線：

「海岸之旅」H3、H4號嶄新路線海岸生態雙線牽

「觀光城巴」全新「海岸之旅」路線中環起點有別於之前嘅中環6號碼頭對開，改為更加靠近中環香港摩天輪嘅中環8號碼頭對開，擺明車馬同Big Bus Tours打對陣！

H3號路線由中環（香港摩天輪）出發，途經灣仔金紫荊廣場，再由香港仔隧道去到「熊貓之家」海洋公園，然後沿着港島南岸向深水灣、淺水灣邁進。旅客可以「隨上隨落」享受怡人海灘風情，並且盡情感受港島海岸線美景。H3號路線以赤柱村/赤柱市集巴士總站做終點，畀旅客對比香港由小漁村躋身成國際大都市嘅反差。

H4號路線由赤柱村/赤柱市集巴士總站出發返回市區，帶領旅客體會海岸美景——途經淺水灣、深水灣、海洋公園，再經過山道天橋，穿梭高樓大廈之間，畀顧客體驗風靡各大社交平台嘅~~「落日飛車」~~（註：「#落日飛車」實為 Big Bus Tours 註冊商標）快感，之後會帶領旅客前往堅彌地城新海旁，時間啱嘅話仲有醉人日落美景，最終返到去中環（香港摩天輪）結束行程。

作為香港唯一提供「隨上隨落」開篷巴士服務嘅「公共巴士營辦商」，城巴一直致力提升顧客體驗，更為全新路線特別改裝開篷巴士，務求更易於應對香港島多彎路窄嘅獨特營運環境，並創先加入全玻璃天幕——新嘅開篷巴士車隊喺2025年3月31號投入「海岸之旅」H3、H4號路線服務，連同2025年2月啟航嘅「熊貓環海號」，為旅客提供更舒適、愉悅觀光體驗。