馬鞍山校巴意外，豐裕旅遊車創辦人不幸辭世

今晨約 6:45，馬鞍山錦英路往烏溪沙上山方向，一部校巴鏟上路邊鐵欄，救護員到場後發現司機已昏迷，隨即送往威爾斯親王醫院搶救，惜最終不治。司機為於沙田區經營校車逾40年的楊樹洪先生。

事發於今早，楊老先生駕駛豐田Coaster 中型巴士前往錦英苑接載褓姆，以準備接載學生返學，豈料即將抵達楊老先生便發生意外，與世長辭。

據「豐裕」董事楊天恩(Francis) 透露，一直頂多只安排老爸「攝位」返學放學兩轉，事發前一日傍晚還跟老父「吹水」，確沒想到如今天人分隔。

業內稱為「楊叔」的楊樹洪先生於四十多年前由三行工人，毅然與太太決定開設校車公司，以其本尊為名「楊樹洪旅運公司」經營，主力服務剛發展漸熟的沙田區，及後來新發展的馬鞍山區域的學校，在得到學校、街坊讚譽而逐漸發展至一定規模。

Francis 指老爸於2016年驗出身體出現問題後決定接手，另希望拓展業務範疇而建立「豐裕」這新名號。本欲要老爸退休享福，唯楊老先生常謂「坐响屋企等死呀」、「你唔俾我揸車隻手痕就捉你嚟『打』」。另一方面，父子二人亦有見過不少親朋於退休不久就撒手人寰。

「衡量過爸爸嘅身體狀況，在有司機缺勤時才會安排老爸開工。並只限『一返一放』(一轉返學，一轉放學)」。楊老先生亦定時覆診和食藥，上週才覆診，並有根據運輸署的續牌要求每年驗身。

楊老先生除咗敬業樂業之外，Francis 另有指老爸有風趣的一面。例如本台拍攝過的 Scania 旅遊巴士，出廠當年在往取車時，老爸見到「螳螂臂」髹上橙色，就對車身廠師傅破口大罵「有無搞錯呀？髹橙色隻蟹鉗熟咗，即係隻蟹死咗啦，仲使做生意嘅！？」著令車身廠改髹綠色「隻蟹夠晒生猛，咁先至大把生意嘛」

Francis 另外指近年有一位新入職司機稱呼他「洪爺」，老爸聽見當堂自嗨「睇吓我幾威」。可見楊老先生係一位人老心不老、個性樂天的長者。如今老父離開，Francis 同太太 Angel 表示會繼承佢敬業樂精神繼續經營公司。

本台仝人在此向 Francis 同 Angel 及楊老太致以深切慰問，並祈願楊老先生在天之靈安息。