「尾偈」中型巴士?!! FTBCI HERO 8 樣板車抵港

長度 9m 以下嘅中型巴士，一直以來受制於先天技術因素，絕大多數採用前置引擎佈局設計。香港嘅中型巴士一直都係「頭機車」嘅天下，即例如 三菱 ROSA、豐田 COASTER，或近期以「台灣做法」Copy & Paste 開拓市場嘅五十鈴 NPR75。

歐洲嘅中型巴士亦係近乎全部為「頭偈」設計，並因應開發成本等需要而採用貨車底盤去建造車身；又雖然日本、中国都有推出過後置引擎嘅中型巴士，例如 FUSO AERO-MIDI ME、本台曾經介紹過嘅 HINO RAINBOW HR、或廈門金龍XMQ6885 等等，但始終未能妥善處理那些「先天技術問題」，近年日本已近乎徹底放棄「尾偈」佈局，中国出品嘛… 算吧啦。

廠房位於中国福建省廈門市嘅豐泰客車 (FTBCI)，由香港人設計及監督生產嘅 HERO 12 大型旅遊巴士，在本港市場銷售多年，早已在旅遊巴業界取得良好口碑。也許代理見業務站穩陣腳，於是耗費經年時間 (當然仲有資金) 夥拍廈門廠商「向難度挑戰」，設計一款長度約 8m 嘅後置引擎中型巴士。首部正式完成生產嘅樣板車日前運抵香港，今日乘著新特約維修中心開幕，向業界展出。

呢部型號名為 HERO 8 嘅中型旅遊巴士，全長8.1m，闊度2.1m；冷氣機組採用有如豐田 Coaster 的構造「內置式」(Integrated type)，令到全車總高僅約2.8m。

車身體積尺寸反映其市場目標相當之清晰。外型採用具「科幻感」嘅頭幅，觀感時尚而線條與左右兩側匹配。尾幅造型簡潔得嚟同樣同樣Cyber look。更是後視鏡頭保護罩有如「一體化」，可見代理「富旭貿易」及廠方於外型設計並非求其。

車廂裝配上同為「香港品牌」嘅 VEGA Seats 維嘉座椅，採用 2+2 380mm座椅佈局，設計載客量 34座位。

車廂最獨特之處莫過於天花嘅冷氣風槽及燈光照明

真係要「點唱」台灣天后蕭亞軒嘅《突然想起你》~ 突然間閃出 Leyland / Volvo Olympian 嘅下層車廂

據代理透露，採用「中央風槽」嘅目的一方面欲減少乘客頭上嘅壓迫感，另一方面就係針對「尾偈巴士」嘅先天技術限制，減輕車身重量並改善重心分佈 (distribution of CG force )。

唔好睇少一條冷氣風槽，因為連同相關車身結構組件嘅重量閒閒哋都60-70kg 。睇落好似唔多，但對於淨重約 4-5噸嘅車而言，真係有必要「減得幾多就幾多」。

燈光照明為三組「無間段式LED燈帶」，分別位於天花兩側同「Olympian 扶手凹槽」

機械規格方面，引擎為「濰柴」直列四缸 3.0L Euro 6 柴油引擎，最大輸出功率達 170PS / 480Nm；配上同樣係濰柴出品嘅 8AT500 八前速自動波箱。對於要驅動滿載總重約7.5-8.0噸，理論上該問題不大。

懸掛採全氣墊式，完全「真•載客車輛」規格，而且前軸更是「隻A臂獨立懸掛」，相對頭偈車頂多只能後軸配上氣墊懸掛可謂「贏成條三號幹線」。

今日承蒙代理邀請到場參觀新車，除咗見到代理及廠方於產品設計同造工質素都相當有誠意之餘亦不禁要講兩句：要週旋於產地問題的話，不如先反思一吓「點解香港無人做呢」_{(唔好再追問出得起幾錢人工，反省吓租旅遊巴、校車俾緊幾多錢）}

特別鳴謝：
富旭貿易有限公司

FTBCI HERO 8 規格簡介
全車尺寸：長 8.1m x 闊 2.1m x 高 2.8m
軸距：4400mm

引擎：濰柴 WP3N 直列四氣缸 Turbo Intercooler，2998cc
最高輸出功率：170PS @2800rpm
最高扭力：480Nm @1800-2400rpm
波箱：濰柴 8AT500 八前速自動波箱
驅動型式：後置引擎後輪驅動

懸掛：
前 – 獨立式雙A臂氣墊懸掛，附防傾桿
後 – 搖臂式雙氣墊懸掛，附防傾桿

制動系統：
全風式雙迴路四輪碟式，附ABS，自動操作廢氣煞車

載客量：
34座位，VEGA 380mm 座椅

以上資料僅供參考，詳情請向代理富旭貿易有限公司查詢。電話 2465-1800