【日本】比亞迪用致癌物生產OEM電動中巴日野憤然解除合作關係

豐田集團旗下商用車牌子——日野自動車早前宣佈，終止同中国電動車生產商比亞迪嘅合作關係，當時未有進一步交代原因。

直至近日，日本當地傳媒報道，以OEM模式由比亞迪喺中国大陸生產，再運到日本本土「貼牌」以日野名義出售嘅電動中型低地台巴士 Poncho Z EV（原型車即係比亞迪J6），被指喺生產過程中用咗國際癌症研究機構一類致癌物「六價鉻」，日野因為咁即時解除同比亞迪之間嘅合作關係。

日野 Poncho Z EV 電動中型低地台巴士原定2023年3月開始喺日本本土上市，日野方面喺產品發售前嘅交流會議得知比亞迪廠方用咗「六價鉻」進行防止金屬表面生銹嘅電鍍處理，而日野曾經探討過改用其他物質取代，但雙方未能達成解決方案，最後日野唯有終止同比亞迪合作。

由於日野 Poncho Z EV 其實就係比亞迪 J6 嘅 OEM 版本，而日本本土早已經有幾間巴士公司率先引入咗比亞迪 J6 試用，大多行走區內嘅接駁巴士路線。

今次消息傳出之後，呢啲巴士公司隨即紛紛停用比亞迪 J6 電動巴士。其中埼玉縣西武巴士亦都宣佈取消比亞迪同廠嘅 K8 電動中型巴士首航嘅發佈會，而已經購買咗4架比亞迪 J6 電動巴士嘅京都京阪巴士亦都話正考慮下一步行動。原本計劃採購日野 Poncho Z EV 嘅愛媛縣伊予鐵巴士（Iyotetsu Bus）就決定改買其他電動巴士代理原有訂單。

日本暫時未有法例禁止汽車生產商使用「六價鉻」，但日本汽車製造商協會（JAMA）就由 2008 年起自願禁止使用。而歐盟就有法規禁止汽車生產商喺乘用車上使用「六價鉻」。今次涉及日野 Poncho Z EV 電動中型低地台巴士用咗「六價鉻」事件嘅雙方，日野汽車就係日本汽車工業會成員，但海外廠商比亞迪就唔係會員企業。

日本喺2017年販售嘅海外生産電單車發現使用「六價鉻」，當時日本採取咗行動回收零部件等應對。位於橫濱嘅比亞迪日本分公司就回應日本傳媒查詢嗰陣就話，依家佢哋已經喺日本賣出4個型號合共大約80架電動巴士，而涉及日野合作關係嘅 J6 電動中型低地台巴士都符合日本必要嘅法規同標準，但就無回應有無喺生產過程中用咗「六價鉻」。

香港嘅九龍巴士以及愉景灣交通服務亦喺2021年短暫借用經香港過境去日本嘅比亞迪 J6 電動中型低地台巴士作非載客測試，但至今未有計劃引入。