【2022聖誕】聖誕特別拉花開篷巴 薑餅燈飾倒數齊參加

2022年12月初，新巴旗下嘅「人力車觀光巴士」推出咗一個「聖誕快樂」特別車身「拉花」，迎接聖誕節。

而且呢個特別嘅聖誕快樂車身拉花仲拉埋出嚟，包埋中環天星碼頭人力車觀光巴士站㖭！

當然，巴士迷最先留意嘅應該係呢個：

隨著「善水」早前公佈「新世界第一巴士服務有限公司」將會喺2023年結束以獨立「牌頭」運作，呢一次係新巴第2個全車身「拉花」改為直接展示城巴標誌。

派發蜂蜜薑餅人

講返正題，聖誕佳節，又點少得一份充滿意義同節日氣氛嘅聖誕禮物呢？

城巴喺12月中就表示為一眾乘客準備咗聖誕小禮物——蜂蜜薑餅人——以答謝一眾乘客日常支持佢哋公司！

城巴揀咗2022年12月17號喺呢3個地點派蜂蜜薑餅人畀乘客：

• 香港仔巴士總站（1000時）
• 皇后山公共運輸總站（1200時）
• 中環天星碼頭（近人力車觀光巴士站）（1500時）

當日，城巴旗下嘅12米版本E500型雙層巴士（車隊編號：8550，車輛登記：XG7018）就身披特別嘅聖誕快樂車身拉花，做今次派發蜂蜜薑餅人活動嘅接駁車，載著城巴嘅員工去到各個派發點。

12月嘅聖誕佳節，最緊要梗係普天同慶、大家一齊開心啦！一間成功嘅公共企業，除咗顧客一直支持之外，當然唔少得員工盡心盡力提供服務，所以派發蜂蜜薑餅人當然就唔會淨係派畀乘客，喺巴士站當值嘅巴士公司職員都有份㗎！

同一時間，為咗同乘客打成一片，一齊慶祝聖誕節，城巴仲準備咗一啲「道具」畀乘客揸喺手影相打卡留念㖭！

講返蜂蜜薑餅人，呢一次係由東華三院旗下社企iBakery精心製作，包裝袋上面仲貼咗城巴聖誕主題貼紙，希望大家一齊過返個歡樂嘅聖誕節！

對於巴士迷嚟講，重點應該都係喺返中環天星碼頭——因為最高興嘅就係見到兩架「聖誕快樂」特別車身「拉花」嘅雙層巴士一齊埋站喇！

話說當日中環天星碼頭呢一度派緊蜂蜜薑餅人嘅時候，新巴旗下人力車觀光巴士H1號路線嘅「聖誕快樂」特別車身「拉花」開篷雙層巴士，就正正喺尖沙咀半島酒店開緊去中環天星碼頭，結果兩架特別「拉花」嘅「聖誕巴士」就喺中環天星碼頭相遇喇！

相關嘅派發蜂蜜薑餅人活動喺大約1600時隨著下一班H1號路線巴士由中環天星碼頭開去尖沙咀半島酒店，兩架特別「拉花」嘅「聖誕巴士」雙雙離開而結束。

聖誕燈飾夜景特別路線H2C

新巴旗下嘅「人力車觀光巴士」既然搞得出「聖誕快樂」特別車身「拉花」開篷雙層巴士，當然就會有埋相關嘅聖誕燈飾夜遊活動啦！

新巴「人力車觀光巴士」喺2022年12月24號到2023年1月2號期間嘅指定時間，特別搞咗「聖誕節夜景路線H2C」，行經中環、灣仔海濱長廊、尖沙咀、尖東麼地里，方便市民乘搭雙層開篷巴士去到唔同地方欣賞聖誕燈飾，感受節日氣氛。

H2C號線喺2022年12月24號到2023年1月2號夜晚指定時間，分別由中環（天星碼頭）以及尖沙咀（漢口道）開出，中途設有多個上落車站，並且途經多個欣賞聖誕燈飾熱點。

H2C號線設有兩款套票，乘客喺2022年12月23號17時開始可以用港幣258蚊嘅優惠價上「城巴eShop」購買套票。

持有有效套票嘅乘客，除咗可以喺使用套票嘅嗰一日無限次乘搭「人力車觀光巴士」路線去到唔同景點隨上隨落，亦可以憑票去到位於尖沙咀K11 Art Mall嘅Moonkok餐廳享用聖誕大餐、特定餐飲優惠，或者換領城巴新巴主題聖誕禮物一份。

H2C號路線單程收費為港幣39.8元。持有其他有效「人力車觀光巴士」全日票嘅乘客客亦可乘搭H2C號路線。

至於講到成個H2C號路線嘅行程，相信重頭戲都應該係喺尖東一帶，尤其重點項目都似乎係尖東麼地裡短暫停留嗰一刻，連接住尖沙咀中心同帝國中心兩棟建築物之間、蓋過路面嘅燈飾，就喺正乘客嘅頭頂上面！

相信都會係呢三年艱苦生活之中難得嘅開心時刻！

除夕夜跨年特別路線H2S

為咗配合2022年12月31號嘅除夕夜倒數活動，新巴「人力車觀光巴士」特設H2S號路線，行經佐敦、灣仔、中環，乘客可以乘坐雙層開篷巴士欣賞夜景以及感受熱鬧氣氛，喺鬧市中歡度除夕迎接2023年。

H2S號路線單程收費為港幣39.8元，喺2022年12月31號2315時以及2320時由佐敦西九龍站開出，經紅磡海底隧道前往灣仔會展、海濱長廊以及中環大會堂，中途均設有上落車站，方便乘客去到唔同地方參與各項倒數活動。

講到成個H2S號路線嘅行程，相信重頭戲都應該係喺灣仔會展站公共運輸交匯處，乘客可以喺開篷巴士嘅上層近距離睇香港旅遊發展局舉辦嘅「香港跨年倒數」加強版「幻彩詠香江」煙火匯演，尤其10棟有份參與喺天台發放煙火嘅大廈之中，有4棟都係圍繞喺會展站公共運輸交匯處附近：

• 新鴻基中心
• 海港中心
• 中環廣場
• 稅務大樓

乘客都感受到隆隆煙火爆發嘅聲音，相信效果都唔會差過喺維多利亞港對岸尖沙咀收睇整個匯演。

節日過後

隨著聖誕新年假期完結，新巴「人力車觀光巴士」嘅「聖誕快樂」全車身特別「拉花」就完成任務，嚟緊將會有新嘅特別「拉花」，喺2023年1月中旬就會同大家見面！