【2022聖誕】各式巴士闖尖東 齊賞燈飾樂融融

話說早喺2022年11月底，巴士台有提及過，如果大家覺得靠自己對腳行尖東睇燈飾會好容易覺得攰嘅話，2022年繼續會有旅行社安排開篷巴士途經尖東嘅燈飾區。

尖沙咀東聖誕燈飾正式亮燈 開篷巴士暢遊其中感受節日氣氛

香港本地巴士遊

香港多間有雙層巴士嘅旅遊公司都紛紛開設尖東燈飾夜遊團，唔少喺一開賣之後無幾耐就已經全團爆滿。去到聖誕節嗰段時間嘅夜晚，一架又一架滿載住乘客嘅旅遊巴士，就帶住呢一班好希望可以近距離欣賞燈飾但又唔使行嘅乘客去到尖沙咀東部。

而平時已經喺香港進行本地開篷巴士遊嘅 Big Bus Tours，亦喺聖誕佳節安排夜遊路線兜去尖東帶乘客欣賞燈飾，而且佢哋仲喺車廂入面擺放一啲聖誕佈置，務求令到乘客感受到更強嘅聖誕氣氛。

私人保留巴士加入與眾同樂

2022年12月26號，香港現時唯一仍然擁有有效車輛登記、被私人保育嘅退役專營雙層巴士——前中巴利蘭珍寶SF15 / SV60——如同2021年聖誕，掛上咗聖誕裝飾，去到尖沙咀東部畀一眾市民「打卡」。

當佢去到尖沙咀東麼地道、麼地里一帶，已經吸引唔少市民，沿路奔跑想追住佢影相。

最後佢去到梳士巴利道海旁一帶，停喺馬路邊一陣就已經吸引大批市民圍堵，搞到連雪糕車叔叔都要退避三舍。

其後佢再去到尖沙咀鬧市嘅天星碼頭同埋半島酒店，遇上咗啱啱結束行程嘅水晶巴士，以及正準備開車嘅新巴「人力車觀光巴士」H2C號路線，喺呢兩架巴士上面嘅乘客都非常雀躍，紛紛企起身揸機影相「打卡」。

不過…好可惜嘅係，當晚呢架珍寶巴士去到尖東嘅時候，竟然有「巴士迷」趁周圍人多，擅自登上巴士，匿藏喺車廂入面跟住架巴士周圍去…雖然「你」心入面可能覺得自己愛上巴士係天經地義，但做出呢一種危害到安全以至整個巴士保育生態嘅行為，確實應該予以嚴厲譴責。

結語

尖東呢一輪嘅聖誕燈飾已經喺2023年1月2號完結，嚟緊燈飾會喺2023年1月更換做農曆新年主題，2023年1月16號~2023年2月5號每晚1730~2300時著燈。