荔枝角道九巴撼貨車 玻璃四濺5人受傷

2021年12月6號中午時份，九巴旗下1架富豪B9TL型雙層巴士（車隊編號：AVBWU532，車輛登記：UV2794），正在行緊42號路線去順利邨期間，喺去到荔枝角道香港專業教育學院（黃克競分校）對開遇上車禍。

由巴士車長通訊群組流傳嘅相片可以見到，巴士同1架平板貨車碰撞，巴士下層左側車身有大面積明顯損毀。

巴士下層車廂入面嘅電子路線顯示器、扶手柱被撞到甩咗，玻璃碎散滿喺車廂地板。消息指車禍中有5人受輕傷，主要係被玻璃碎擦傷。

車禍發生後，消防派出救護人員到場治理傷者，交通警察亦到場調查。