城巴最後「歐3躉」 退役日子正臨近

城巴非專利部近年一直手執一批由專利部「移籍」嘅巴士提供服務――包括巴士租賃同埋居民巴士――呢啲巴士往往喺香港已經有咁上下「年資」，屬於巴士業界嘅「老朋友」，每每去到真係「彌留」之際就吸引到一眾巴士迷「瞻仰」。

88R搭矮躉 最後日子倒數緊

例子就有過去呢幾個月內退役嘅「矮躉」同埋「超豪」，喺臨近真正退役之前嘅一兩星期，城巴88R號路線總會有一班巴士迷接連出現。

城巴「超豪」瀕退役 一批巴迷「送殯」忙

2018年7月12日，新巴招標出售6架配置亞歷山大ALX500型車身、歐盟3期排放標準嘅丹尼士三叉戟型12米版本雙層巴士，結果配有以下前新巴車隊編號嘅5架「移籍」去咗城巴非專利部，並且改油咗城巴標準車身色彩：

• 1210
• 1212
• 1213
• 1214
• 1221

呢5架城巴非專利部嘅「新」巴士改配以下城巴車隊編號，並且投入居民巴士以及租賃服務：

• 2312
• 2313
• 2314
• 2315
• 2316

由於香港運輸處由2020年1月1號開始唔再續牌畀歐盟3期排放標準嘅柴油商業車輛，呢個政策令呢批巴士由2020年開始被強制淘汰而退役。

嚟到2021年3月，由新巴「移籍」去城巴非專利部嘅呢5架歐盟3期排放標準嘅丹尼士三叉戟型12米版本雙層巴士，就只淨低2312同埋2314仍然服役，亦有出沒喺城巴88R號路線。

城巴最終決定呢批「歐3躉」最後服務日期係2021年3月26號，巴士迷可以安排「送殯」…不過沙田第一城嘅居民就肯定又有「新巴士」可以搭喇！