【英格蘭】列車出軌撞橋 幸好無人受傷

當地時間2021年3月13號黃昏，英格蘭發生一宗列車出軌意外，現場係距離利物浦中央火車站大約12公里、位於默西塞特郡諾斯利都市自治市內嘅科比（Kirkby）火車站。

科比火車站屬於默西鐵路北綫其中一條支綫嘅終點站，事發時一列「英國鐵路507型」列車喺埋站時突然出軌，掃爛月台，並且撞上一條橫跨路軌嘅雙線行車橋。

由乘客同途人拍攝到嘅現場照片可以見到，列車車頭以及被撞嘅月台設施有明顯損毀，路軌佈滿瓦礫。

當地消防隊喺當地時間1901時接報，首批兩架消防車4分鐘後趕到，並且陸續增援，更加派出專門應付災難事故嘅搜救專隊。

救援人員到場隨即展開拯救，消息指列車上當時有12名乘客，全部報稱無受傷，而且可以自行落車。至於列車車長經消防員協助下亦成功離開駕駛室，交由救護員檢查，相信亦無受傷。

經過大約兩個半鐘頭嘅搜索，確定無其他人被困後，當地消防隊喺當地時間大約2140時決定可以「收隊」。

默西鐵路指由於今次意外，設施搶修需時，科比火車站因此關閉，北綫列車會改以米巷（Rice Lane）火車站作臨時終點站，會安排巴士接駁去科比。

英國鐵路亦表示，暫停旗下前往科比火車站嘅列車服務，相信喺3月15號仍然無法提供服務。

涉及今次意外嘅「英國鐵路507型」列車，一抽三卡編成，首批列車由1978年開始取代二戰前生產嘅「英國鐵路502 / 503型」列車。

隨著年事已高，默西運輸喺2016年1月決定招標建造新列車，同年12月宣佈瑞士施泰德鐵路公司以4億6000萬鎊中標。新列車代號「英國鐵路777 Metro型」，由2018年開始喺瑞士同波蘭生產，預計2021年可以全面取代「英國鐵路507型」列車。