巴士轉彎要「偷位」 夾硬揳入盞蝕底

道路上一般都畫上咗行車線指示，一般嚟講跟著行都應該無問題――如果你只係遇上人人都揸緊細車嘅話…

值得留意嘅係，重型車輛體積較大，現有標準嘅行車線雖然喺直行路段嘅闊度係足以容納重型車輛，但去到轉彎嘅時候，由於車輛其實唔會只係一粒點咁好似波子跟條坑咁碌過去，而係一個有一定長度同一定闊度嘅方形物體，結果會喺路面掃過一定面積嘅範圍――而越大型嘅車輛就越會掃過越大嘅範圍――往往要安全避開路邊障礙物咁轉彎時，原本嘅單一行車線容納唔晒，形成需要「借用」埋旁邊行車線嘅空間，是謂「偷位」，駕駛者同行人都要小心呢個「偷位」範圍，免生危險。

2020年9月17號朝早，喺銅鑼灣就發生咗一宗因為忽略巴士轉彎要「偷位」嘅輕微車禍，情況就如圖如片所示，結果要勞動埋消防員到場睇吓有無夾到人。

涉事嘅係城巴ADL Enviro500 12米版本雙層巴士（車隊編號：8132，車輛登記：PF8486），正要由怡和街轉入銅鑼灣道，有一架現代客貨車就同時揳咗入去巴士轉彎嘅內側，結果被夾爛車頭。

嗱，呢啲就叫貪快得慢囉！