炎夏好想食雪糕？ 維記電車齊齊Go！

話說2020年嘅夏天香港就非常酷熱，行到出街個人好快就熱到懵下懵下咁，諗住行入去便利店買個雪糕食啦…點知有一日…

乜嘢事呀？！點解身處九龍都避唔開香港電車？！（=_=）

打返電話畀電車公司人士問吓：

「電車公司出雪糕？」

『55…你終於發現到…其實呢~（略）…不如你嚟我office畀你研究吓啲product啦！』

於是乎喺一個香港天文台發出咗酷熱天氣警告嘅下晝，去到香港電車喺屈地街車廠嘅寫字樓， 終於同全套系列產品見到面。

首先呢一套產品嘅故事背景就係咁：

香港「維記牛奶」（維記）每日都喺自家廠房製造新鮮又美味嘅牛奶、雪糕、乳酪產品，一直全心全意為香港每家每戶提供優質產品。

適逢2020年係維記80週年，香港電車就認為既然大家都係香港人家傳戶曉嘅本地商標，索性攜手合作推出一套4款週年紀念版迷你雪米糍，將昔日懷舊味道同埋回憶帶畀市民，希望將笑容掛到每一個香港人嘅面上。

而呢一套週年紀念版迷你雪米糍，每款都係一盒4粒獨立包裝，口味以4款懷舊甜品為主題：

• 黑白（豆腐芝麻）
• 芒果西米
• 紅豆沙
• 椰汁糕

夏天食雪糕，啱口味嘅自然食得心花怒放，加埋維記同香港電車呢一啲香港本地商標，當然值得支持…而更重要嘅係包裝上有多款電車圖案，電車迷萬勿錯過。

不過要留意今次4款雪米糍並唔係一齊喺同一個地方出售：

• 黑白(豆腐芝麻) 、芒果西米2款迷你雪米糍會喺OK 便利店獨家發售
• 紅豆沙、椰汁糕2款迷你雪米糍就喺AEON 超級市場獨家發售

為咗儲個包裝盒而專登走去買，都唔會嘥好多時間啩？

維記同香港電車原來仲整咗1款Q版玩具電車…不過…好似唔見有真車上咗呢個廣告嘅？！