拎架都躉換隻雞延續勝利嘅光輝

如果提起香港獨有嘅公共巴士車款，相信有一定資歷嘅巴士迷都應該會講得出其中一款係利蘭勝利二型，外號「雞車」。

點解我會認同 #勝利二型真係 Icon of Hong Kong唔止係全球獨有，亦唔止係英國 Tailor made 俾香港仲有嘅係呢款車可以話係香港人諗出嚟，或者係由香港人提出想法、主張出嚟當英國佬認定雙層巴士前置引擎只能 Half Cab，要 Door in front overhang 必須後置引擎，香港人話要，就迫到 #英國殖民走狗焗住要整出嚟所謂「唔掂諗到掂」就係香港人嘅精神。
Posted by Jacky Lim 林鴻達 on Thursday, May 21, 2020

利蘭勝利二型可以話係專登為香港特別設計出嚟嘅一個巴士車款，由1970年代尾開始，服役於香港專營巴士前後達到20年，可以話係見證住香港經濟轉型到發展巔峰嘅時間。

利蘭勝利二型退役之時，香港正值蓬勃發展，唔少大型道路交通基礎建設相繼落成。管理呢一啲新建成道路基建嘅管理公司，為咗應付萬一有大型車輛喺相關道路上面發生意外，佢哋嘅員工都有能力可以作出應變，佢哋需要一啲「任玩唔嬲」嘅車輛作訓練之用，一批啱啱喺呢個時間退役嘅利蘭勝利二型就成為「被時代揀中嘅老嘢」。

其中喺1997年通車嘅青嶼幹線，負責管理嘅青馬管理有限公司（即係現時嘅「交通基建管理有限公司」）當年由九巴手上買咗兩架勝利二型（車隊編號：G97、G490，車輛登記：CC5426、CW9345）用嚟訓練佢哋嘅員工。

其後G490車頂被移除、上層被改建，用以方便維修隧道，最後被巴士迷買咗做G36嘅零件車，現時已經拆咗。

至於G97，佢喺青嶼幹線一直保持住雙層巴士外形，有另一批巴士迷為咗拎佢去做G304嘅零件車，特別搵咗前九巴丹尼士三叉戟「金都躉」（車隊編號：ATR251，車輛登記：JS6529）去同交通基建管理有限公司交換，並且喺2020年5月28號拖走G97。