疫情擴展客杳然 城、新提放無薪假

隨著新型冠狀病毒（武漢肺炎）疫情不斷擴散，香港市面人跡驟降，連帶公眾交通服務人次同時暴跌。

根據城巴、新巴所述，近來旗下巴士客量下跌超過四成，因應呢個情況，佢哋已經縮減巴士服務班次，亦拎部份巴士留廠停運，甚至停止「派更」畀兼職員工。

然而，公司指即使已經收車削班，但財政上仍然有嚴重虧蝕，故此公司人力資源部喺2020年2月18號發出通告，鼓勵旗下員工自願放無薪假，同公司共渡時艱。

首階段無薪假會由即日至2020年3月31號，員工放無薪假需要喺2日前遞「假紙」。

公司喺通告亦指，即使員工放咗無薪假，遇上要用工作日計算薪酬福利項目同晉升嘅時候，無薪假嘅日子仍然會當做工作日咁計。