【港鐵受襲】「暴徒」縱火賀新年 輕鐵巴士齊牽連

立場新聞引述港鐵指，2020年1月1號凌晨大約兩點，有大約 5 個不知名人士去到輕鐵屯門車廠站，走入一抽去緊屯門碼頭方向嘅 615P 號綫輕鐵列車，喺頭卡車廂內縱火。

當時車廂內乘客迅即自行疏散，無人受傷，其後車長用滅火筒將火撲滅。受事件影響，輕鐵 610 同 615P 號綫需要改道，飛咗屯門美樂站到青雲站一段。

而喺差唔多嘅時間，港鐵屯門車廠職員喺閉路電視畫面見到有不知名人士向車廠範圍掟汽油彈，1架停喺車廠入面港鐵雙層巴士因而著火，火勢由車廠職員自行撲滅，雙層巴士左邊車身受損、玻璃破裂，事件中無人受傷。

根據港鐵發放嘅相片，可以見到受襲嘅係亞歷山大丹尼士Enviro500型12米版本雙層巴士（車隊編號801，車輛登記NE5930），當年由九廣鐵路公司喺2007年1月訂購，2008年1月31號作首次登記。

港鐵表示，強烈讉責「暴徒」嘅行為，批評會嚴重危及乘客同埋員工安全，已經報警追究。