雙層巴士突撞樹 乘客重傷血如注

2019年12月18號16點幾，一架九巴雙層巴士喺粉嶺公路發生嚴重交通意外！

涉事嘅係九巴Dennis Trident E500 Turbo 12米雙層巴士（ATENU341，TA6723），當時行緊978號路線。

當巴士喺粉嶺公路去到松柏塱附近時，因事抽入左邊路肩，突然撞到路邊一棵大樹，巴士左邊車身被劏開，上層損毀尤其嚴重，有巴士乘客被拋出巴士外。

現場消息指超過40人受傷，其中3人傷勢嚴重昏迷，消防處已經列作大量傷者事故處理，大批救援人員正喺現場拯救。

網上有消息指，最少有2名乘客被困上層，並疑似失去意識，更加有人頭部晾喺巴士車身邊緣，有鮮血向下流。

而據巴士公司電台消息，車務督察回報起碼36人受傷，可能有5人不治。

綜合幾方消息，5名乘客現場證實死亡，1名乘客送院後不治，6名死者為3男3女。

(照片撮自whatsapp巴士車長群組)

受車禍影響，現場交通嚴重擠塞，預計大量公共交通服務會受阻。