【英國巴士】 大家停低一分鐘 悼念逝去嘅員工

英國倫敦市郊奧平頓喺當地時間10月31號（星期四）夜晚發生引致有車長殉職嘅巴士相撞意外，涉及今次不幸事件嘅Go-Ahead集團除咗發起眾籌以援助死者家屬之外，佢哋員工另外再發起咗默哀行動。

當地時間11月4號朝早1100時，大倫敦地區嘅巴士車長都集體停低巴士一分鐘，向喺10月31號晚殉職嘅巴士車長Kenneth Matcham致哀。

Go-Ahead集團董事總經理表示，Kenneth Matcham嘅慘劇令人感覺可怕嘅震撼，只要情況安全，都可以停低巴士一分鐘作哀悼，以示尊敬佢。

Stagecoach營運總監表示同意佢公司旗下巴士車長喺同一刻亦有相應默哀行動，「我經工會留意到大家都想對佢展示敬意，我同意咁做…應該做到類似『國殤星期日』咁」。

大倫敦地區有唔少巴士車長都想籌款幫殉職嘅車長家屬渡過難關，繼較早前Go-Ahead集團喺網上眾籌5,000鎊，而結果超額籌到多達15,000鎊之後，一眾喺倫敦工作嘅巴士車長另外再發起新一輪眾籌活動，期望能夠再進一步協助殉職車長嘅家屬，目標同樣定喺5,000鎊，但到截稿一刻已經籌到超過18,000鎊。

人哋呢啲就係團結喇~香港呢？