【美國巴士】車撞鹿飛穿玻璃 校巴六傷兼一死

當地時間10月29號0712時，美國麻省碧仙桃縣達特茅斯發生一宗驚險校巴車禍。

當時有一架車行駛期間撞上咗一隻200磅重嘅公鹿，然後被撞嘅公鹿成隻飛起，再迎頭撞上對面線一架載住34名中學生嘅校巴。

呢隻公鹿直接喺校巴駕駛位嘅車頭玻璃開咗個窿，兜頭撞正校巴車長，據校巴車長事後向WCVB-TV所講，呢隻公鹿穿玻璃撞入校巴嗰時仲「生勾勾」，撞完佢之後，鹿頭擱喺佢大髀，仲識揈啲鹿角，「我都唔知點解唔中我個頭或者條頸」。

校巴車長雖然畀隻公鹿撞到手腕同多隻手指骨折，但仍然臨危不亂，將校巴停喺路邊，一邊擔心隻公鹿爬起身周圍衝，一邊行勻校巴全車確定全部學生安全逃離車廂。

當地醫院已經安排校巴車長喺11月1號做手術治療骨折部位，預計6~8星期可以基本康復，佢向記者表示唔會放棄呢份工作，並且準備好隨時再去接送學生，「如果佢哋畀得我揸車，我聽日就開工」。

至於一班學生，當中5人被玻璃碎割傷，幸好傷勢輕微，其餘29名學生就一係由家長接走，一係經家長同意下繼續返學。

有學生向記者表示「突然好大聲撞到好大件嘢，跟著成個背囊都係玻璃碎」、「有啲鹿嘅內臟定肉碎撻咗上我個身，好核突」。

睇到呢度，應該大家都淨係數到有6個傷者，標題講嘅「一死」喺邊？其實就係隻公鹿，咁樣連續撞2架車，結果傷勢太重，捱咗一陣就魂歸天國――願上主庇佑佢嘅靈魂。

順帶一提：根據現行《香港法例》第374章《道路交通條例》第56條，喺香港如果揸車撞倒牛、豬、馬、驢、騾、山羊、綿羊呢7種動物，都要停車報警，香港警方亦會列作「交通意外」處理。