全球一遍環保減碳呼聲之下，唔少汽車製造商開始主力發展電動車。講到電動巴士，相信好多人即刻諗起中国比亞迪，就連「大英祖國」嘅 ADL 都要依賴 BYD。不過一間總部位於英國嘅電動汽車設計開發公司 Equipmake，日前就公佈將會推出一款名為 Jewel E 嘅純電動雙層巴士。
唔好話「巴膠」，就是私家車迷對於 Equipmake 呢個牌子都一頭霧水。到底呢間公司乜嘢來頭？原來早响「香港淪陷」嘅1997年成立，一直集中汽車電力驅動科技研究。2007年發明「電力儲能飛輪」並為一級方程式車隊威廉士 (Williams) 垂青，2008年更注資入 Equipmake，將「電力儲能飛輪」改良升級，除咗使 Audi 車隊 2010年法國 Le Man 耐力賽勝出之外，有關嘅技術被重型車組件廠商 GKN 收購，裝配在倫敦的巴士上成為「混能巴士」。响 2017年，Equipmake 同巴西商用車生產商 Agrale 聯手於南美市場推出電動巴士。
就咁睇公司歷史背景，似乎有啲料到。再睇埋 Jewel E 採用 ZF 前後車軸，反映呢間公司對於新產品開發唔會過份進取亂嚟，電池佈局亦算精心安排，似乎「做足功課」有備而戰。
(左後輪相對位置尚有一組電池)
外形可算相當唔錯，車頭設計唔會死板，有返一啲「型格」。車身由位於 (西班牙) 加泰隆尼亞嘅 Beulas (讀 bee-wu-la，唔係「標勒屎」) 操刀。雖然 Beulas 有自家嘅雙層客車車身而型號名稱 Jewel，但撇除車身長度差別，Jewel E 都無乜影子。
反而車頭有如「鷹嘴啄」設計有著同是位於加泰嘅 Noge 嘅 Touring、Titanium 車身嘅神髓。
Beulas 呢個牌子嘅車身其實有進入過香港市場。响大約2000年咁上下嘅日子，Iveco 當時香港代理商啟帆就引入配上 Beulas Stergo 車身嘅 Eurorider 底盤嘅旅遊巴士。
可能礙於造價高逾 130萬港元 (當年 Scania 底盤配本港車身總計造價僅約100萬)，且當時嘅運輸署未有濫用「署長基於公眾利益批准豁免」機制，為免滿載時後軸承重超過法例上限嘅10噸，全車長度只有11.4米，過境規格設洗手間載客量只能 45 座位，故此在港售出數量唔多。
現時英國普遍採用嘅 ADL、Wright、MCV 車身均為鋁合金結構，Equipmake 未有透露 Beulas 設計及建造嘅車身物料。
Equipmake 表示 Jewel E 有三種電池儲電量選擇，最高的 543kwh 預計續航力 250miles，即約400km。英國當地就應該問題不大，不過廠方並未有披露 fully charged 需時幾耐。唔好諗嚟唔嚟香港喇，即使維持車身長度10.8m，但點都要加裝冷氣，續航距離剩低唔知仲有無一半…..
另一樣值得留意嘅係，ZF、Voith、Eaton 均推出「輪邊摩打驅動軸」，理論上將摩打動力輸出損耗減至最低，但 Equipmake 為採用其自家的 HTM 3500 電動摩打，排出有如波箱-傳動軸-尾牙嘅佈局，標準規格尾牙差速比 6.19:1，理論上動力輸出損耗相當大，但又大幅提高減速剎車時嘅電能回收效率，唔知算唔算另一場「電動巴士軍備競賽」
Equipmake 聲稱現正申請倫敦 TfL 嘅車輛規格認可，預計2024年正式投入服務。
1 Trackback / Pingback