2021年5月8~9號，途人行經位處新界粉嶺馬會道302號嘅香港青年協會領袖學院（即係前．「新界裁判署」／舊粉嶺裁判法院）都會發覺多咗一位「老客人」：早已退役嘅前中巴利蘭珍寶SF15。
每逢有舊巴士出沒就自然吸引街坊到場「打卡」，但重點係「佢走入去做乜？」
話說巴士台之前報道過有特殊教育學校活用退役巴士做教室，教育有特殊教育需要（SEN）嘅學生…
其實喺另一方面，香港社福界有唔少其他同工都致力幫助有特殊教育需要（SEN）學童――其中賽馬會「藝術有SENse」計劃（英文：Jockey Club Arts Make SENse Programme；下簡稱「藝術有SENse」）係由香港小童群益會主辦、香港賽馬會慈善信託基金捐助，以視覺藝術作為媒介啟發有特殊教育需要（SEN）學童嘅服務計劃。「藝術有SENse」旨在運用視覺藝術元素同埋感官關聯（sensory association），通過藝術創作歷程，為有SEN狀態嘅學童提供情緒出口，提升佢哋嘅社交溝通技巧，畀佢哋體驗由創作而嚟嘅滿足感。
賽馬會「藝術有SENse」計劃亦透過展覽，嘗試打破社會大眾對SEN社群嘅刻板印象同埋標籤，提倡「make SENse又好，SEN狀態都好， 聚焦喺藝術濾鏡之下，原來大家可以好common」。
「藝術有SENse」喺2021年5月期間舉行「Common SENse：藝術介入SEN的巴士展覽」（簡稱「Common SENse」），去到近年俗稱「熱狗」嘅退役雙層巴士裡面，展出特邀藝術家因應關注SEN發展嘅藝術創作，並且加設現場藝術工作坊（例如：迷宮設計、電線網淺浮雕、學習Matisse繪畫等）畀參觀者即時體驗。
連續三個周末，展覽巴士會走入3個唔同地點，畀公眾人士上巴士參觀，令大眾可以由藝術視點進入「SEN成長旅程」嘅感官（ sense）經驗同埋想像世界。
「Common SENse」 流動巴士展覧，由藝術界著名藝術家白雙全以及資深策展人梁展峰帶領，邀請咗廣受歡迎嘅插畫師飛天豬，以及巴士迷概念藝術家林兆榮參與創作。
走入退役巴士嘅獨特空間裡面，策展團隊嘗試將SEN學童成長嘅感官經驗，連結巴士路線與及腦神經多樣性嘅互換概念，呈現喺模仿搭巴士經驗旅程當中；透過呢個流動展覽，等公眾人士進一步了解SEN有幾普遍（common）以及SEN狀態嘅感官（sense）特質同埋專長。
「Common SENse」 流動巴士展覧設喺退役雙層巴士裡面，背後原因在於有部分SEN情況嘅學童特別喜愛巴士、喜愛巴士路線規劃結構嘅縝密，策展團隊於是突出呢一份獨有嘅美感同埋感官體驗。學童可以藉巴士路線圖走入巴士嘅世界，再由地圖跳脫返出嚟，離開固有場景，剩低縱橫交錯嘅「水管畫」，呈現結構與線條之美。
交錯嘅線條構成形狀，填上顏色，就變成一個個「色塊」，學童喺散佈色塊同埋線條嘅大畫布上面，可以連結並且投入自己嘅想像世界。團隊轉化原本單一固有圖像，一步步擴闊想像，成為可以使用視像語言閱讀、欣賞、分享嘅世界。
每個人大腦神經結構或許好唔同，令彼此有時未能接通，但人能夠通過藝術以及想像，喺較廣闊嘅平台相遇以及互相諒解。因此策展團隊將學童愛巴士路線嘅思緒加上藝術創作，轉化成一個個喺巴士上嘅展品，畀大眾一同擴闊想像，以視覺語言（visual language）閱讀、欣賞、分享學童嘅世界。
有自閉症嘅動物學家Temple Grandin曾經話過：「我用視覺嚟思考，言語只係我嘅第二語言。」――咁就講明，SEN狀況只代表腦神經多樣性――當以藝術介入，SEN就可以係潛能而唔係限制，更加唔一定係「病」。
展覧以「坐巴士」做故事線，藉藝術家飛天豬同埋林兆榮以視覺藝術作品嚟演繹SEN學童嘅生活趣事以及奇思妙想，用藝術品為大眾對SEN嘅關注畫出「諒解備忘」――SEN學童或許喺學習以及社交上遇到困難，但無損佢哋對世界嘅好奇同埋想像。
參展藝術家林兆榮專門研究城市、交通歷史、香港電影、藝術設計、粵語粗口等，佢話自己係讀藝術、搞文化研究、會行長途路、砌Lego、鍾意城市、寫故事…嘅「沙田巴膠」。
既然佢本身都係巴士迷，喺展覽中創作咗以《18X！巴士極速十八區》為題、一日搭巴士跨越18區嘅「遊巴士河」活動，邀請巴士迷參加，由路線網絡嘅縝密交錯，以遊戲突出唔同人對巴士路線嘅認知同埋想像，展現縝密而交錯嘅路線網絡何以吸引某一啲人。
因為爸爸係退休巴士司機，飛天豬自細就鍾意坐巴士「導航位」跟住爸爸「遊河」、最享受巴士車廂無人嘅時間――因為可以喺巴士車廂任意走動、揀位坐、撳鐘――對「坐巴士」自然特別有感情同埋經驗
佢展出以《熱狗上的返學日記》為題嘅各式藝術作品，述說一段SEN學童搭巴士返學嘅奇妙故事。佢相信：「喺佢哋（SEN）嘅想像世界裡面一切都美好，我哋經常用規則、規矩限制咗好多我哋嘅想像空間。」
好多呢一代嘅學童，往往喺生活上沉醉喺「電子世界」，又有幾多人認真諗過――其實單係用「巴士」話題做切入點，可以有唔少書籍值得畀學童閱讀，培養出閱讀興趣而唔單一依賴「電子世界」？
同一時間，Rolling Books 喺「Common SENse」活動期間，會去到場地設立流動圖書角，畀家長可以同小朋友一齊「促膝講故仔」。
「Common SENse：藝術介入SEN的巴士展覽」開幕儀式喺2021年5月8號假香港青年協會領袖學院舉行，邀請到香港小童群益會（主席、負責嘅社工）、策展團隊（白雙全、梁展峰、莊國棟）等人一同到場分享。
參觀者走上巴士，可以藉藝術探索自己生活習慣以外、其他人嘅感官世界――而呢一種探索係唔只得視覺一個途徑…
如果讀者有一直睇開巴士台嘅報道，可能對之前聖雅各福群會喺電車上面搞陶藝展覽有啲印象…
白雙全係1個情景創作藝術家（contextual artist），擅長運用環境或者處境入面嘅限制搞創作――越有難度嘅小組就越積極諗方法疏理；同時亦轉化咗看待SEN學童特質、現場環境、時間限制嘅諗法。白雙全喺今次「Common SENse」計劃就結合咗3個元素：
- 感官刺激：由接觸物料出發，再去探索當下空間、同參加者嘅身體動作互動；
- 美感訓練：豐富學童嘅想像，建構對作品造型，再一步步裝飾；
- 技術提升：創作涉及一定技術，由小部件開展，令作品慢慢組織達致完整。
白雙全喺2021年「Common SENse」活動首日就帶領咗1個題為《小公路大建設》嘅工作坊，正正就係利用陶泥，畀參加者感受泥嘅質感，令觸感經驗主導創作，從而用陶泥合作建立一個城市結構，粉飾自己獨特城區，並從中開展對話同埋交流。
另一邊廂，師從翟仕堯老師同埋王冬齡教授、喺香港中文大學做緊兼任講師嘅漢字書法家徐沛之，就有1個題為《行書道路網》嘅書法工作坊。
徐沛之教導參加者點樣「揸筆」同埋「開筆」之後，就用咗幾位漢字書法家嘅作品講解「筆風」――書寫者喺書寫書法時候嘅情緒變化、情感特徵――令人喺「似同唔似」之間學習中文字結構嘅美學，從而想像喺「守同唔守」之間明白規矩本意係叫人自由。
徐沛之指導參加者抄寫九巴嘅《乘客須知》，套用平日搭巴士時嘅情感，將《乘客須知》用行草抄寫上紙條，掛起嚟隨風起舞。
即係咁講，如果有朝一日巴士上嘅告示由「字粒字」變返「書法字」，大家又會唔會留意多啲？
至於講返架「藝術巴士」，嚟緊嘅2個週末會去到其他地方畀公眾參觀：
東華三院馬草壟營地
地址：上水馬草壟路33號
日期：2021年5月15~16號
時間：1200~1800
石屋家園
地址：九龍城聯合道 133 號
日期：2021年5月22~23號
時間：1200~2000
有興趣參觀就記低喇！
2 Trackbacks / Pingbacks