當地時間2020年8月3號下晝，英格蘭牛津郡迪德科特1架Thames Travel旗下配Wright Gemini 3車身嘅富豪B5TL雙層巴士上面，有1名坐喺上層左側車尾窗邊嘅長者乘客受傷，巴士車長將巴士揸到哈威爾Great Western Park屋苑附近報警求助。
負責當地救傷服務嘅中南救護服務信託喺接報後派出救護車趕赴現場，救護員初步治理過傷者之後，發覺唔適合喺巴士車廂入面搬傷者返落巴士下層經車門離開，於是喺大約17:40向牛津郡消防及救援隊要求支援。
迪德科特消防局幾分鐘内已經派人員到場，仲聯絡埋巴士公司工程人員做技術指導，消防員視察過情況之後，認為最好係「爆窗抬佢出嚟」。不過佢哋又覺得單靠手扶梯搬個傷者出嚟太冒險，如果有其他工具就更好。
所以佢哋搵咗Rewley Road消防局幫拖，揸咗1架油壓升降台消防車去升兜埋窗抬個傷者出嚟。
事件喺傍晚19時左右解決，受傷乘客經醫治後無生命危險，而雙層巴士嘅傷勢就只係「少咗1塊玻璃」。
香港自1949年引入雙層巴士，多年嚟香港救援體系自然都有考慮埋雙層巴士上點處理傷者。
近年香港消防處更加接收咗一啲專營巴士公司嘅退役雙層巴士，畀一眾學員以至現職救援人員學習喺唔同情況下，處理牽涉到雙層巴士嘅意外。
假如遇上英格蘭今次咁嘅情況，香港消防處會點處理？
嗱，或者用返2018年5月20號Aria Studio幫香港電台拍攝《火速救兵 IV》嗰時嘅情景嚟睇睇…
大家都係拆窗抬人，但香港消防處坍塌搜救專隊配備嘅大搶救車，車頂個高度原來同雙層巴士個上層位置可以配合得幾好，只要抬到個傷者過去大搶救車個車頂，之後就容易好多…（不過戲劇效果…真實意外現場可能又無位咁樣擺車）
又如果意外情況好大鑊…例如話成架巴士反咗又要壓住另外嘅車？
唔使拎「口罩明」單嘢講嘅，作為「國際級專業救援隊伍」，你估香港消防處訓練嗰陣唔包呢種情景咩？
成架雙層巴士反咗、壓住私家車…點固定、爆破、救人、扶正…全套都係留返喺訓練場地算喇！
1 Trackback / Pingback