近月香港巴士界不乏「懷舊」議題，由城巴40週年推出復古車身色彩，到「珍寶」、「水翼船」、「白水箱」一眾老爺出巡，以至前中巴首部引入嘅丹尼士禿鷹冷氣巴士重返香港，著實吸引巴士迷追逐。
然而，鍾意舊巴士嘅又豈止巴士迷…自2009年開始推出多款貼紙嘅米青三口，亦有推出香港公共交通工具側影系列貼紙，睇吓大家認到幾多款，當中唔少得「舊嘢」啦！
首先睇吓1976年系列，現時推出咗2款，分別代表中環同荃灣…
中環版有大會堂、美利樓，當年纜車係鮮紅色，香港島嘅舊巴士仍然係紅色加黃色 
荃灣版有福來邨、寶石大廈，亦有由九龍經荃灣去屯門同元朗嘅舊巴士
另一個係1980~1983年系列，涵蓋港九兩地同埋「紅隧口」…
喺以前，巴士唔係車頭就係車尾有一部份凹入去… 
懷唔懷念香港島一街藍色巴士嘅時代？ 
「紅隧口」除咗過海嘅巴士「車海」之外，有幾多人記得「紅磡站」以前係叫「九龍車站」？
當然，如果話要搵返啲依家嘅交通工具款式，又點會無呢~
赤鱲角香港國際機場…咁多款機場巴士「拉花」集齊未？ 
港九新界全包宴？
嗱，米青三口向來除咗喺香港有寄賣之外，隨著互聯網絡發展，網購越嚟越方便，其實去到臺、日等外地都有一定市場，所以發展埋海外主題，臺灣嘅朋友對呢啲應該唔陌生…
至於講返啲貼紙，一版嘅大細約為60毫米 x 100毫米，每一張雙層巴士貼紙就大約9毫米高，分開5大組合方式出售，拉勻一版大約13蚊港紙。貪得意買啲嚟做裝飾，寫信時貼返啲上信紙都幾好㗎！
如果有興趣，可以去網店睇吓其他主題嘅貼紙啱唔啱心水，支持一下香港本土設計師啦！
Be the first to comment