巴士台之前報道過，新加坡陸路交通管理局（Land Transport Authority）喺2026年9月23號開始實施新法例，鼓勵巴士乘客保持良好品德，為公共巴士同埋巴士總站、轉換站營造一個更安全、更有同理心同埋舒服嘅搭巴士環境畀所有人。相隔1個月，英國政府表示推出新措施打擊巴士同埋火車乘客令人生厭行為，有助公眾去街嗰陣感覺更安全、更舒適。
簡單嚟講，英國政府嘅新措施包括3樣嘢：
- 透過針對火車同埋巴士上不良乘客行為嘅協調措施，提醒乘客遵守守則
- 地方當局新增權力，打擊電子煙同埋亂拋垃圾等滋擾行為，巴士上嘅違例者最高可被罰款 100 英鎊
- 呼籲火車乘客「享受車程，咪製造噪音」，拒絕配合嘅人士將會面臨檢控埋同罰款
英國政府2026年10月19號發出新聞稿表示，即日推出嘅全新政府措施將會惠及廣大乘客，當局會致力打擊公共交通工具上嘅「反社會行為」，其中包括對唔遵守相關規定嘅巴士乘客罰款 100 英鎊，以及推出1項全新宣傳運動，遏止火車上嘅「擴音滋擾」（loudcasting）。
英國政府向地方當局發出指引，表達支援地方當局行使新權力，嚴厲打擊巴士上嘅強勁音樂、亂拋垃圾、吸食電子煙同埋恐嚇行為，包括有權向製造滋擾嘅人士發出最高 100 英鎊嘅定額罰款。
公共交通工具上嘅「擴音滋擾」已經成為現代日常搭車中最令人煩躁嘅事之一。英國政府展開1項全新嘅全英國宣傳運動，旨在鼓勵火車乘客「享受車程，咪製造噪音」，為所有人改善搭車環境，呢個亦係英國政府落實日常改善措施嘅一部分。
呢項由業界主導嘅宣傳運動將會包括鐵路網絡現行守則嘅語音廣播提醒；如果有乘客經獲授權嘅鐵路職員勸阻後仍然拒絕停止滋擾行為，會被要求喺下一站落車，或者面臨最高達 1 000 英鎊嘅罰款。
英國首相貝安德（Andy Burnham）表示：「我哋所有人都有過咁嘅經歷：搭火車途中，隔離位突然用手機大聲播音樂或者影片。呢啲真係好鬼勞氣，仲好快會破壞晒成程車嘅心情。所以我哋正喺度推出1項全國宣傳運動，提醒乘客搭火車要用耳機。除此之外，我哋亦會賦予地方當局新權力，去打擊巴士上嘅強勁音樂、吸食電子煙同埋亂拋垃圾行為。呢樣雖然係小事，但對於我哋所有人嚟講，足以令每一程車變得好過啲。」
英國運輸大臣艾凱迪（Heidi Alexander）表示：「少數人嘅自私行為——無論係食電子煙、亂拋垃圾定係開大喇叭聽歌——破壞咗其餘所有人嘅行程，真係令人好沮喪。就算係行為上嘅微小改變，都可以為公眾嘅公共交通體驗帶嚟巨大嘅改善。呢樣就係點解我哋要賦權地方當局去根據社區需求改善巴士服務，並且善用公營火車營運公司嘅渠道，去鼓勵大家喺搭車嗰陣多啲為他人着想，同時提醒嗰嗰唔咁做嘅人可能需要承擔嘅後果。」
地方當局喺巴士執法嘅權力係透過《2025年巴士服務法案》（Bus Services Act 2025）落實，呢個意味着英格蘭所有地方交通當局都可以制定同埋執行各自嘅本地適應規則。相關規則之下，巴士司機唔會負責執法，相反，獲授權嘅人員（包括交通安全主任同埋警察）將有權處理呢類事件。
執法人員會遵循3步曲程序：
- 同當事人溝通
- 解釋相關規則同埋對其他乘客嘅影響
- 如果對方拒絕配合就採取執法行動
火車宣傳運動將會終結唔同鐵路營運商之間「各行其是」嘅局面，有助喺整個網絡建立清晰、一致嘅訊息。大多數營運商會喺網站、社交媒體、車廂內同埋車站展示相關宣傳，並會包括海報同埋廣播。
呢次宣傳展現咗喺公營體制下，火車營運商點樣可以推動更緊密嘅協作，聚焦提升乘客體驗，從而有效打擊「反社會行為」。
英格蘭所有地方交通當局打擊巴士滋擾行為嘅法定權力已經喺 2026 年 8 月 5 號正式生效。2026年10月19號嘅指引將會協助佢哋將呢啲新嘅本地規則付諸實踐，而每一項附例喺落實執行之前，都必須得到英運輸大臣嘅批准。
西米德蘭市長白理察（Richard Parker）表示：「穿梭喺我哋呢個地區嘅公眾理應感受到舒適、尊重，最重要係安全。雖然絕大多數嘅行程都平安無事，但係我哋公共交通網絡上嘅『反社會行為』——無論係吸食電子煙、亂拋垃圾、大聲播音樂、睇片定係大聲喧嘩——都破壞咗所有人嘅感受。我哋嘅『安全出行夥伴』（Safer Travel Partnership）同埋交通安全主任已經為公眾乘搭巴士、火車同埋電車嘅旅程帶嚟正面改變。喺政府清晰嘅指引同埋支持下，我哋可以行得更遠，堅守承諾，令每一程車都更安靜、更乾淨、更安全。」
「爭取更好交通運動」（Campaign for Better Transport）行政總裁鮑本（Ben Plowden）表示：「開聲嘈住晒咁用手機、吸食電子煙同埋亂拋垃圾等『反社會行為』唔單止令人煩躁，仲可能實質阻礙公眾（特別係有唔同無障礙需求嘅人士）使用公共交通工具。如果呢啲新權力能夠促使恰當同埋顯眼嘅執法，將會有助每個人喺公共交通工具上感到安全同埋舒適，盡情享受旅程。我哋大家都可以盡自己嘅本分，對身邊嘅同車乘客多一份體貼：將行李同埋雙腳移開座位、抬頭望下並且主動將座位讓畀有需要嘅人，或者喺有需要時立即騰出輪椅空間。」
Be the first to comment