【英國】2026年夏季慳錢計劃巴士車費優惠 1450萬人次受惠

話說巴士台之前報道過，英國政府話英格蘭地區兒童可以喺2026年8月免費搭巴士，呢啲政績實有政客需要跟進…

英國政府喺2026年9月25號發新聞稿，指呢個「英國夏季慳錢計劃」（Great British Summer Savings）幫英格蘭嘅家庭慳咗生活開銷，期間提供超過1 450萬程免費巴士旅程。

英國政府發言人話呢個計劃能夠成功，有賴政府廣泛努力，旨在令全英國嘅巴士對每個人嚟講都更加負擔得起同埋容易搭得到。

英國政府呢個「英國夏季慳錢計劃」下面有個「夏日巴士車費優惠」（Summer Bus Fare Offer），全英格蘭幾百萬個年齡介乎 5 歲同 15 歲之間嘅兒童，喺2026年8月暑假期間都享受到免費搭巴士。由於英格蘭兒童巴士車費通常高達2英鎊，2026 年 8 月 1 ~ 31 號實施「夏日巴士車費優惠」，眾多家庭能夠喺所有參與計劃嘅巴士上節省「去街街」嘅開銷。根據英國政府嘅最新數據，2026年8月有超過1 450萬人次享受到「兒童免費搭巴士」呢個優惠。

多得呢個計劃，英格蘭嘅細路仔可以完全免費搭巴士去沙灘、國家公園同埋其他好玩嘅一日遊地方，同時幫佢哋嘅屋企人爭取到更多「唞啖氣」嘅空間。根據客運交通協會（Confederation of Passenger Transport）同埋參與營辦商嘅數據，全英格蘭各地嘅巴士公司都匯報咗乘客量大幅增加。

英國巴士與地方交通大臣Simon Lightwood表示：「無論係去海邊、公園定係博物館，見到今個夏天有幾百萬個細路免費搭巴士，真係好正。『英國夏季慳錢計劃』喺生活成本壓力之中，畀咗家庭『唞啖氣』嘅空間。我哋正喺度將乘客帶返上巴士，轉型全國嘅服務，由出（2027）年開始將車費上限設喺2英鎊，仲會為殘疾乘客提供全日 24 小時嘅免費巴士服務。」

客運交通協會（Confederation of Passenger Transport）行政總裁Graham Vidler表示：「我哋嘅會員好自豪今（2026年）個夏天提供咗超過1 400萬程免費兒童旅程——相當於英格蘭每個後生仔女有2程。幾百萬名兒童同佢哋嘅屋企人探索咗自己嘅本地社區，仲體驗到搭巴士出街嘅自由。隨住我哋踏入秋季，全國嘅巴士仍然喺度負責送細路返學，同埋畀乘客繼續去探索地區，全國上下都有提供物有所值嘅車飛選擇。」

英國巴士使用者協會（Bus Users UK）行政總裁Lydia Horbury表示：「呢個係一個如夢似仙嘅結果。細路免費搭巴士幫咗家庭好好利用夏天，同時畀幾百萬年輕人擁有自由去出街、探索同享受佢哋嘅本地社區所提供嘅一切。今（2026年）個 9 月嘅『搭巴士月』（Catch the Bus Month）全心全意去挑戰過時嘅觀念，同埋鼓勵大家畀個機會搭巴士。呢啲數據顯示咗，當我哋打破隔膜，令搭巴士成為一個負擔得起、方便同埋真係有吸引力嘅選擇嗰陣，係可以做到幾多嘢。當年輕人親自發現巴士可以提供到乜嘢，嗰啲經驗可以幫手將搭巴士變成一世人嘅習慣。呢個對乘客、社區同埋可持續通勤嘅未來嚟講都係好消息。」

整個英格蘭地區，無論係東北部（north-east）、東米德蘭（East Midlands）定係西南部（south-west），免費巴士車費都幫咗更多年輕人喺各地搭巴士週圍去。

東北部有1條巴士路線喺2026年暑假錄得嘅兒童乘客比2025年同期多出 710%。大曼徹斯特（Greater Manchester）嘅蜂網（Bee Network）喺2026年夏天有接近170萬人次兒童搭佢哋嘅巴士，比2025年同期多咗748 000人次，而東米德蘭（East Midlands）嘅巴士乘客量就幾乎多咗1倍。

英國政府喺新聞稿末段再次表示，呢個計劃嘅成功有賴政府廣泛做嘢，旨在令巴士服務更加負擔得起同埋更容易搭巴士，嚟緊 2027 年 1 月會推出2英鎊（£2）車費上限，同埋畀殘疾證持有人享用全日 24 小時免費搭巴士。