由2016年開始，南韓釜山嘅巴士司機朱亨民（주형민，FB：hyoungmin.joo.74，IG：jujuju3840，YouTube：@koni3840）承襲公司前輩自2006年開始嘅「傳統」，喺12月臨近聖誕節嘅時候會戴上聖誕帽、裝飾自己揸嘅巴士，以此拉開釜山聖誕季節嘅序幕，當地嘅小朋友以及去釜山遊覽嘅遊客都排隊搭佢嘅「聖誕巴士」。
但係喺2025年12月，由於「安全風險」，當地政府叫停咗朱亨民嘅「聖誕巴士」，而朱亨民就自己另外尋找其他方式傳遞節日歡樂。
釜山市政府喺2025年12月11號正式取締朱亨民嘅「聖誕巴士」，原因係收到市民投訴巴士內部裝飾——包括棉花裝飾、小聖誕樹——存在火災風險，當局嘅呢一個決定令到自2006年以來呢架「聖誕巴士」作為當地深受喜愛節日「傳統」以及小型「旅遊景點」戛然而止。
朱亨民由2016年開始就自己籌集資金裝飾「聖誕巴士」，而呢架「聖誕巴士」透過口耳相傳以至網絡社交媒體迅速走紅，吸引咗嚟自南韓本地以至國際遊客——尤其係嚟自日本以及臺灣嘅遊客。
187號巴士路線由大進交通（대진운수）營運，由佢哋公司位於機張郡高村（고촌역）嘅營業點出發開往大龍村（대룡마을），假日期間日均客流量可達1000人次，朱亨民每天會揸3班。
2025年，因為大進交通最近引進咗新型氫能電動巴士，巴士車廂內部空間更大，令到朱亨民佈置「聖誕巴士」所用嘅時間比往年長咗——花咗67個鐘頭先至完成。
朱亨民原本係一名美術專業畢業生，佢喺接受南韓當地嘅傳媒訪問嘅時候話自己提前幾個月就開始籌劃，「年初我就開始設計內飾，畫咗藍圖，甚至用埋Photoshop做咗細節。整整4日，我幾乎無返過屋企，裝飾巴士期間都只係求其瞌一瞌（根本無點瞓過）。」
當喺收到「令人心碎」嘅「叫停」通知後，朱亨民只係用咗一個鐘頭就將所有原本做嘅裝飾嘢還原返——不過朱亨民承認，「叫停」通知並非毫無預兆——朱亨民喺2025年12月20號接受南韓《中央日報》採訪嗰陣講到：「我當時就諗，『呢件事終於發生』，之前嗰9年，我搞親『聖誕巴士』嘅每一年都會收到投訴。我以前都係喺聖誕節前10日左右開始揸『聖誕巴士』，所以即使收到投訴，我都可以一直揸到聖誕節當日，今（2025）年我由12月1號就開始揸，結果明顯對我不利（12月11號就已經叫停）。」
「當局叫停『聖誕巴士』」嘅消息並未立即傳開。就喺「卸除所有裝飾」生效當日，釜山當地一間幼兒日托中心嘅小朋友去參觀巴士廠，並唔知道聖誕裝飾已經被拆晒——剛睇到空蕩蕩嘅巴士，一眾小朋友就齊齊喊晒。
朱亨民見到小朋友失望而回，第2日佢就扮成聖誕老人去幼兒日托中心，「當我見到成班小朋友睇見聖誕老人嗰陣時臉上露出燦爛笑容，我突然諗到，『點解我只等佢哋嚟坐「聖誕巴士」呢？』，於是我決定親自去探啲小朋友。」
依家朱亨民計劃喺2025年12月25號聖誕夜去到位於海雲台區盤松洞嘅基督教青年會（YMCA）托兒中心，佢已經花咗大約400萬韓圜（約2 700美元）購買糖果、聖誕帽以及其他禮物送畀小朋友——呢啲原本係打算送畀乘搭「聖誕巴士」嘅乘客。佢話：「我會扮成聖誕老人，分發禮物畀小朋友，令小朋友留低美好回憶。」
雖然當局叫停咗朱亨民嘅「聖誕巴士」，但釜山市政府同時有提出延續「聖誕巴士」嘅方案——將裝飾放喺巴士外面而唔係車廂入面——朱亨民對此表示接納。釜山市政府計畫由2025年12月22號開始，同包括朱亨民所在嘅大進交通在內嘅10間巴士公司合作，營運喺車身外面掛有裝飾嘅「聖誕主題巴士」。
「節日氣氛」同「公眾安全」，明顯從來都唔係絕對對立。
Be the first to comment