華泰國際第5屆免費乘車日 除咗電車仲加碼有埋輕鐵！

2025年中秋佳節，華泰國際金融控股有限公司(「華泰國際」)舉辦第5屆免費乘車日活動，呢次仲改叫「輕鐵叮叮樂」，全香港市民以及遊客喺中秋節（2025年10月6號）當日可以無限次免費乘搭輕鐵以及全線載客電車，同親朋好友遊覽港島或者新界嘅同時，共度中秋。

全線載客電車會由頭班車到尾班車都唔收取車費，不過公眾要留意，輕鐵免費乘車時段係由2025年10月6號頭班車開始，直到2025年10月6號2359時止，以入站拍卡機顯示嘅時間為準，使用八達通卡嘅乘客需要如常拍卡出入輕鐵站，並且保留紀錄以便有需要時核查；然而上述時段內毋須購買單程票。詳情請參閱港鐵網站。

華泰國際與香港同心同行，攜手譜寫出城市新篇章，2025年嘅輕鐵電車免費乘車日活動同時獲得港鐵公司（「港鐵」）以及香港電車有限公司（「香港電車」）支持，以「益心華泰・共創明Teen」（Yixin Huatai, Strive and Rise）為主題，理念源於堅信青年潛力、旨在促進社區連繫，並且推動可持續發展嘅未來願景，附以啟發青少年探索夢想、創造明天，鼓勵青少年以創意同埋行動參與社區建設，塑造充滿希望嘅未來。

2025年嘅輕鐵電車免費乘車日活動啟動禮喺2025年10月5號朝早假港鐵輕鐵部嘅屯門輕鐵車廠舉行，承蒙香港特別行政區政務司司長陳國基先生親臨主禮，並且有華泰證券私人財富管理委員會主任委員暨華泰金融控股（香港）有限公司首席執行官王磊博士、港鐵公司常務總監——香港客運服務楊美珍女士、香港電車有限公司董事總經理戴弘博先生等機構嘉賓出席 。 活動現場仲有管樂步操表演，氣氛熱烈，充分展現咗社會各方嘅鼎力支持，一同為活動增添光彩。

香港特別行政區政務司司長陳國基先生提及：「感謝主辦單位華泰國際、港鐵公司以及電車公司，感謝你哋多年嚟積極推動公益事業，回饋社會，展現企業嘅責任與及擔當，為社會注入正能量。今（2025）年更首次將輕鐵納入免費乘車日，活動範圍由港島延伸至新界西北，畀更多市民受惠，進一步促進社會嘅連結與及融合，亦體現企業對社會嘅關懷。今（2025）年活動主題係『益心華泰・共創明Teen』，正好呼應咗政府推動青年發展嘅政策方向。特區政府致力為青年創造更多機會，並鼓勵企業積極參與其中。我哋透過《青年發展藍圖》，重點培育青年正向思維、支持多元發展、鼓勵參與公共事務，並且加強國民身分認同。活動有唔少嘅『共創明「Teen」』學員參與。『共創明「Teen」計劃』自推出以嚟，已經吸引超過10 000名中學生參與。透過企業參訪、職涯探索、個人發展工作坊等活動，有效幫助青年建立自信、擴闊視野、規劃未來。青年係社會嘅未來，亦係推動香港持續發展嘅重要力量。我哋非常高興見到華泰國際、港鐵公司以及電車公司對公益事業嘅投入，支持青年發展。展望未來，我相信只要『政、商、民』繼續同心協力，攜手同行，一定能夠為青年搭建更廣闊嘅發展舞台，助力佢哋穩步前行，為香港嘅長遠發展注入新動力。」

華泰證券私人財富管理委員會主任委員暨華泰金融控股（香港）有限公司首席執行官王磊博士致辭表示:：「華泰國際始終致力於植根香港、服務香港 ，自2021年起每年都將『中秋免費乘車日』作為1份禮物送給全港市民。今（2025）年又適逢華泰證券 H 股上市10週年，第5屆『輕鐵叮叮樂』我們特意將這份心意升級，積極參與公益、回饋社會，以實際行動參與北都區發展、支持特區政府施政、與各界攜手譜寫香港發展新篇章。」

港鐵公司常務總監——香港客運服務楊美珍女士表示：「輕鐵服務屯門、元朗同埋天水圍30幾年，『叮叮聲』係輕鐵的標記之一，伴隨新市鎮蓬勃發展。港鐵好榮幸能夠參與本屆『輕鐵叮叮樂』活動，同各界攜手促進社區連繫、支持青年發展。我哋會秉持『推動城市前行』嘅理念繼續提供優質服務為顧客帶嚟更多幸福感。」

香港電車有限公司董事總經理戴弘博（Paul Tirvaudey）先生表示（原文為英語）：「今（2025）年已經係香港電車第5年同華泰合作舉辦『免費乘車日』活動。『叮叮』穿梭港島超過120年，見證城市變遷、服務一代又一代市民，深受本地居民以至旅客喜愛。我哋希望可以繼續同唔同界別攜手，支持社會公益、深化社區聯繫、培育年青新一代，為推動城市可持續發展貢獻力量。」

為進一步促進社區以及青年參與呢次活動，主辦方特別邀請咗近100名「共創明『Teen』計劃」嘅學員參觀輕鐵車廠以及電車車廠，畀佢哋近距離了解輕鐵以及電車嘅運作、交通工具同城市發展嘅歷史，從而鼓勵佢哋立志日後參與建設社區。

一如以往，華泰國際嘅「叮叮樂」免費乘車日都會有全車身廣告作宣傳，2025年就有香港電車#118電車以及港鐵#1157列車。