2011年，香港總商會為慶祝成立150週年，決定喺當年5月29號舉行「香港總商會全程為您」活動，贊助市民乘搭香港電車（全線）、天星小輪（尖沙咀←→中環、尖沙咀←→灣仔），活動當日所有乘客都毋須繳付相關車費、船費。
由於第一次舉辦呢個活動已經吸引到市民留意，自此以後香港總商會每年都舉辦同一活動，而日期就由原本嘅5月29號，去到2016年開始改為11月29號。
嚟到2019年，「香港總商會全程為您」呢個活動繼續喺11月29號舉行，同樣係所有乘搭香港電車以及天星小輪嘅乘客都毋須繳付相關車費、船費。
一般嚟講，喺舉辦呢個「香港總商會全程為您」活動嘅嗰段時間，香港電車都會有一批電車會披上全車身廣告，車廂入面嘅八達通機同埋錢箱都會被套上布袋，提示乘客落車時唔使畀車費。
至於天星小輪方面，咁就真係未見過成隻天星小輪都上咗一個全船身嘅廣告，但係一般嚟講喺碼頭都會有一啲宣傳海報，代幣售賣機同埋閘機會被笠起，提示乘客唔使畀船費。
不過2019年嘅呢一日，天星碼頭嘅宣傳品就真係比起往年相形見拙。
而根據喺現場觀察，2019年嘅11月29號確實係較多乘客選擇乘搭電車同天星小輪。
呢個免費乘搭車船嘅活動，將會持續到收車、收船嘅時間，大家記得多謝香港總商會喇！
Be the first to comment