2023年1月15號喺中環遮打道舉行嘅「香港車會嘉年華2023」入面，香港古典巴士保育團體 Island Vintage Bus 派出藏品——前中巴「白水箱」Tilling-Stevens “Express” K5LA7 單層巴士參展。
呢架前中巴「白水箱」巴士喺1949年開始喺香港投入服務，原車牌「4943」，喺退役後一度被改裝成為訓練巴士，離開訓練車隊後被棄置喺灣仔碼頭充當茶水站同貨倉。
及後去到1970年代，時任中巴交通經理李日新先生（Sir Lyndon Rees）私人斥資買咗「白水箱」，再請退休技師進行復修，完成修復後取得「HK104」古典車牌並且由中巴收藏，仲喺往後幾十年多次出席公眾活動，包括英女王登基銀禧紀念巡遊等。
儘管中巴喺1998年失落公共巴士專營權，但仍然對「白水箱」照顧有加，直到2015年都仲有每年為佢驗車、續牌。
在此之前，呢架「白水箱」係全香港「擁有車輛登記嘅最高車齢巴士」，隨著中巴無再為「白水箱」續牌先至將呢個銜頭轉讓俾「Jumbo Bus Hong Kong」嘅前中巴利蘭珍寶SF15！（編按：修復後嘅利蘭珍寶SF15係以「特別用途車輛」登記，嚴格嚟講已經唔算係「巴士」！）
2019年嗰陣，因為中巴柴灣車廠需要收地重建發展，中巴決定將喺車廠內沉睡咗幾年嘅「白水箱」轉售畀富有古典巴士保育經驗嘅 Island Vintage Bus 進行再次修復同收藏。巴士修復完成後，曾經喺2020年頭舉行嘅「香港車會嘉年華2020」上展出。
礙於又稱為「武漢肺炎」嘅「新型冠狀病毒病」肆虐全球，唔同階段嘅嚴苛防疫措施都令 Island Vintage Bus 旗下嘅多架古典巴士無法喺公眾活動上同公眾見面。但為古典巴士進行基本保養同修復嘅工作都仍然需要繼續進行。
嚟到2023年，「白水箱」再次喺公眾場合展出，雖然基於安全理由，「白水箱」無辦法開放車箱畀公眾參觀，但仍然吸引到唔少人扶老攜幼去現場親身望一眼、「打卡」留念。
今次「白水箱」得以用最佳狀態出席闊別兩年嘅「香港車會嘉年華2023」，實在有賴參與《古典巴士修復保育贊助計劃》嘅個人同商業贊助人支持！
《古典巴士修復保育贊助計劃》整合民間及商業贊助嘅資源，保存香港交通歷史同埋一批有代表性嘅古典巴士。贊助人仲可報名參加 Island Vintage Bus 唔定期舉行嘅導賞活動，了解修復同埋保育古典巴士流程，以及旗下各架古典巴士嘅修復狀況。
與其只係「口講」希望見到香港嘅古典巴士修復成點點點，不如都試吓「有錢出錢、有力出力」咁參與其中，為保育香港交通歷史出一分力吖！
Be the first to comment