每年嘅聖誕節都係旅遊旺季，香港有唔少人都鍾意趁住聖誕長假期一家大細離開香港去外面旅遊，時間嚟到2025年嘅聖誕節，如果有香港人諗住不如試下留低係香港過節，又或者咁啱要接待由其他地方嚟香港玩嘅親朋好友嘅話，介紹一個香港好地方畀大家…
當大家以為太平山山頂只係海外遊客先至會趨之若鶩嘅景點，但喺2025年就有唔少香港人視佢為本地遊熱點：
臨近聖誕佳節，雖然無好似以往咁搞變裝派對，但香港山頂纜車都有喺車廂入面加裝一啲聖誕佈置，當然香港山頂纜車就一向都重視安全，加裝嘅呢一啲聖誕佈置應該就唔會好似南韓釜山咁樣搞到有人擔心會有火警危險而走去投訴嘅…不過重點唔係呢樣…
「山頂纜車 + 山頂凌霄閣」× 迪士尼 = 「Mickey Keep It Real」主題活動
山頂纜車以及凌霄閣喺2025年呈獻全香港首個迪士尼「Mickey Keep It Real」主題活動，將太平山頂改造成充滿驚喜嘅慶典！一班人氣角色會由中環山頂纜車總站出發陪所有Disney fans展開一場橫跨整個太平山頂嘅精彩旅程：
- 米奇與米妮
- 唐老鴨與黛絲
- 高飛與布魯托
- 鋼牙與大鼻
大家行入山頂纜車嘅車廂就會即刻見到有一班迪士尼人氣角色，佢哋仲要已經換好晒聖誕裝祝大家聖誕快樂！當然如果大家想「打卡」嘅話就要揸緊時間同埋小心斜路喇！
至於由山底到山頂，山頂纜車以及凌霄閣都準備咗一啲唔同嘅迪士尼人氣角色裝置畀大家「打卡」：
- 唐老鴨《POV自拍時刻》（山頂纜車中環總站入口）
- 米奇與好友的《太平山光影之旅》（山頂纜車中環總站、山頂總站入面）
- 「Mickey Keep It Real」主題纜車（山頂纜車車卡）
- 米奇《I ❤ HK》（山頂凌霄閣1樓）
- 米奇與好友《Peak Runway》（山頂凌霄閣P2樓中庭）
- 米奇《Chill級巨星》（山頂凌霄閣西邊——視乎天氣狀況）
- 米奇《愛心觀景台》（山頂凌霄閣摩天台428 ）
- 米奇與米妮的《天際之旅》（山頂凌霄閣摩天台428 ）
- 唐老鴨與黛絲的《浪漫角落》（山頂凌霄閣摩天台428 ）
- 鋼牙與大鼻的《#BetterTogether玩樂時光》（山頂凌霄閣摩天台428 ）
單係「打卡」感到意猶未盡嘅話，山頂凌霄閣仲有「Mickey Keep It Real」期間限定店為大家準備了過百款迪士尼主題精品，款式應有盡有，當中仲有太平山頂限定、全香港首次發售嘅「米奇與好友」商品，千祈唔好錯過！
山頂纜車以及凌霄閣嘅母公司香港上海大酒店鼓勵將愛分享，所以喺活動期間購買「米奇與好友」蓋章明信片，當中所得收益扣除必須嘅成本開支後，山頂纜車以及凌霄閣會將全數捐贈畀「願望成真基金」，為 3~17 歲並且患有重病嘅兒童創造改寫生命嘅願望，與米奇好友們一同傳遞溫暖同埋愛！
This is Hong Kong：美樂體驗館回望逐漸遠去嘅舊香港
香港本土嘅美樂士多喺山頂凌霄閣開咗旗下首間體驗館，佈置咗一批舊香港實物，再加招牌懷舊零食，唔止長輩可以懷念過去，後輩亦可以傳承香港本土記憶，由開幕就已經吸引唔少香港人「登山」穿越時空。
美樂士多呢個香港本土懷舊嘜頭繼美樂照相館後，得到山頂凌霄閣支持就開設「美樂體驗館」，帶公眾返去1970~1980年代嘅舊香港。由昔日陪伴香港人成長嘅「西瓜波」、早期電子遊戲機，以至逐步消失嘅騎乘玩具車、士多雪櫃等，打卡度極高。
當然巴士台介紹得就梗係有啲特別嘢，由舊款九巴巴士站牌，到傳統紅色小巴地點牌布之外，仲有手動臨時交通管制「停、去」牌，甚至喺一啲舊卡式錄音帶盒上面印有「白頭地鐵列車」圖案，就睇大家有無緣同佢哋合照。
當中近門口嘅美樂士多賣嘢都致力重現舊香港，搜羅大量懷舊零食、兒時玩意以及香港本地製造嘅產品，由復古汽水到復刻糖果，除咗係小小士多，仲係承傳香港本土回憶，帶大家返去嗰個充滿人情味嘅香港街頭。
而為咗迎接聖誕節，美樂體驗館入面嘅課室場境仲特意喺黑板同壁布板整返應節裝飾，唔知又有無令大家回憶返細個返學嗰陣嘅感覺？
山頂纜車 營業時間：0730時至2300時（星期一至日及公眾假期） 山頂纜車尾班車喺2300時開出 （山頂纜車只設非預先分配座位以及企位，先到先得）
凌霄閣摩天台428 營業時間：1000時至2200時（星期一至星期五)﹔0800時至2200時（星期六、日及公眾假期） （由於天氣等原因，無法確保當下景觀質素。此情況下，門票不作退款或更換）
美樂體驗館
營業時間：每日1100時至2000時（星期一至日及公眾假期）
購票詳情請參閱太平山頂網站。
Be the first to comment