VWTB首架電動巴士近日交車

總部設喺巴西雷森迪嘅福士貨車及巴士工業及車輛貿易有限公司（VWTB）宣布即將交付佢哋生産嘅首批電動巴士。

呢款叫做「e-Volksbus 22L」嘅電動巴士喺呢幾個星期內會喺巴西聖保羅正式投入運營，並且已經着手規劃推廣到包括雷森迪在內嘅其他巴西城市。

VWTB同時表示公司自成立以嚟累計產量已經達到125萬架，VWTB主席兼行政總裁Roberto Cortes表示，呢個係行業一個重要里程碑，亦彰顯咗VWTB對巴西市場以及環境、社會、企業管理政策嘅承諾。公司非常高興迎嚟第125萬架産品出廠，同時見證到全新「e-Volksbus 22L」誕生，標誌着客運進入一個新時代。

首批「e-Volksbus 22L」訂單合共100架，包括訂咗50架嘅聖保羅市公共交通公司Transpass。首架「e-Volksbus 22L」會喺2025年12月交畀巴西雷森迪嘅Princesinha do Vale巴士公司為公眾提供服務，剩餘車輛會喺2026年1月開始陸續交車畀其他公共交通公司，好快就會喺巴西其他城市投入服務。

「e-Volksbus 22L」係專為城市公共交通而設計，可相容長度達13.2米嘅車身，最多可容納82名乘客，巴士搭載12個已經應用喺福士「e-Delivery」電動貨車上嘅電池組提供能量，續航里程可以達到250公里。

自2025年5月以嚟，「e-Volksbus 22L」一直喺巴西聖保羅進行日常實際路況營運評估，收集營運數據驗證車輛嘅性能、效率、可靠性。據VWTB所講，呢啲試驗結果直接支持咗「e-Volksbus 22L」由試點使用過渡到商業應用。

交車之餘，VWTB推出咗一項專門針對電動巴士營運嘅技術支援以及售後服務計劃，旨在為客戶提供直接營運指導，涵蓋可以喺巴士營運商車廠進行嘅充電策略、車輛使用以及維修行動。

VWTB同時表示經銷商網路已經準備好為電動巴士提供服務，支援服務嘅其中關鍵係備件供應，持續客戶支援中嘅重要部分包括遙測數據、改良充電計劃，詳細服務方案仲可以根據唔同嘅營運模式「度身訂做」，旨在盡力提高車輛可用度和營運連續度。

VWTB主席兼行政總裁Roberto Cortes就講到，自測試階段以嚟，VWTB一直積極參與並且同客戶保持密切聯繫。除咗培訓之外，VWTB團隊仲提供遙測數據，密切監察製定巴士充電計劃，以改善車輛使用率——VWTB正在為市場樹立新嘅行業服務標準。